Denis Istomin Lujou turniri finalida o'ynaydi

Sovrin jamg'armasi 54 160 AQSH dollarini tashkil qiluvchi ushbu turnirda mamlakatimizning birinchi raketkasi Denis Istomin ham muvaffaqiyatli ishtirok etyapti. ATP reytingida 211-o'rinni egallab turgan Istomin bundan bir necha daqiqa avval final chiptasini qo'lga kiritdi. 

Hamyurtimiz yarim final uchrashuvida turnirning ettinchi raketkasi serbiyalik Danilo Petrovichga qarshi kortga chiqdi. Birinchi setning ettinchi geymidan so'ng 3:4 hisobida yutqazayotgan Petrovich bahsni davom ettira olmasligini malum qildi va buning natijasida Istomin finalga yo'l oldi.

Turnirning 9-raketkasi bo'lgan Denis ertaga o'tkaziladigan hal qiluvchi final uchrashuvida Alexandro Davidovich Fokinaga qarshi bahs olib boradi. Ispaniyalik bu tennischi dunyo reytingida 93-pog'onadan joy olgan. Istominning yarim finaldagi raqibi esa ATP reytingida 195-o'rinni egallab turgandi.