Dilmurod Nabiev: “Birgalikda bu falokat oqibatlarini bartaraf etamiz“

Favqulodda vaziyat oqibatlarini bartaraf etish maqsadida, suv ombori atrofidagi hududlar aholisi xavfsiz joyga evakuaciya qilinib, boshpana va oziq-ovqat bilan taminlandi.

Bugun, O'zbekiston Respublikasi Jismoniy tarbiya va sport vaziri Dilmurod Nabiev Sardobadagi fojia natijasida uy-joyidan ayrilib, Guliston ixtisoslashtirilgan olimpiya zaxiralari maktab-internatiga joylashtirilgan 700 nafarga yaqin fuqaroning holidan xabar oldi va sardobaliklarga yaratilgan shart-sharoitlar bilan tanishdi.

– Bu falokat birgina sizlarning boshingizga kelgan musibat emas. Bugun butun xalqimiz siz bilan birga. Hammamiz birlashib, bu baxtsiz hodisa oqibatlarini tezroq bartaraf etishga harakat qilamiz. Aslo tushkunlikka tushmang, tez kunlarda yana odatiy hayot tarziga qaytasizlar. Bu erda siz va farzandlaringiz uchun barcha sharoitlar yaratib beriladi, – deb aytib o'tdi Jismoniy tarbiya va sport vaziri D.Nabiev Guliston IOZMIga joylashtirilgan aholi bilan muloqot chog'ida.

Jismoniy tarbiya va sport vazirligi tomonidan tabiiy ofatdan aziyat chekkan Sardoba tumani aholisiga 18 turdagi oziq-ovqat mahsulotlari, 12 turdagi jami 1500 dan ortiq sport jihozlari, 5 xildagi issiq kiyim-kechak, gigienik vositalar hamda bolalar uchun badiiy kitoblar jamlanmalari va maktab-o'quv qurollari taqdim etildi.