Xalqaro turnir. Butun Turon xovosliklarga havas ila boqdi

Tumanning Qayirma degan qishlog'i bor. Odamlari mehnatkash, sportsevar. Ayniqsa, belbog'li kurashning chin ustalari, elkasi er ko'rmagan polvonlari ko'p bu zaminning. SHundanmi, belbog'li kurash ixlosmandlari,sportchi va murabbiylar har yili ushbu qishloqda o'tadigan yirik xalqaro turnir — “Xalqaro do'stlik kubogi” musobaqasini intiqlik bilan kutadi. 

Sayil kurashi musobaqasining yana bir ahamiyatli tomoni, turnir belbog'li kurash rivojiga katta hissa qo'shgan, ammo bugun oramizda bo'lmagan ustoz polvonlar xotirasiga bag'ishlab o'tkazilishidir.

Xovos tuman hokimligi, tuman prokuraturasi, Sirdaryo viloyati belbog'li kurash federaciyasi hamda homiylar hamkorligidagi bu yilgi turnirda yurtimiz polvonlaridan tashqari Tojikiston, Qirg'iz Respublikasidan belbog'li kurash ustalari ishtirok etishdi.

Kun davomida qariyb 5000 nafardan ziyod kurash ixlosmandi chin manoda yayradi. Ko'p-ko'p solimlar berildi. Muxlislar Baxtiyor Jumaboev, Husan Abduhakimov, Farrux Narzullaev, Umidjon Ortiqov, Bobur To'xtasinov kabi polvonlarning abjirligiga, mahoratiga tahsinlar o'qidi. G'oliblar qimmatbaho va esdalik sovg'alari bilan taqdirlandi.    

— Belbog'li kurash sirdaryoliklarning qon-qoniga singib ketgan, - dedi biz bilan suhbatda xalqaro turnir tashkilotchisi, sport fidoyisi, Sirdaryo viloyat belbog'li kurash federaciyasi raisi Mamur Umarov. — Mana bugun ham dongdor kurashchilar bilan bir qatorda ko'plab yosh polvonlar mardlar maydonida o'z omadini sinab ko'rdi, kuch va mahoratini sinovdan o'tkazdi. 

Ayniqsa, Tojikiston va Qirg'iz Respublikasidan el orini elkasiga olgan polvonlarning kelishi, ular ijrosidagi hayajonli bellashuvlar ananaviy turnirimizga yanada joziba bag'ishladi. Bundan tashqari, hayajonli tadbir qardosh xalqlar o'rtasidagi do'stlik, birodarlik aloqalarining yanada mustahkamlanishiga hissa qo'shdi.

Murabbiylar shogirdlarining tayyorgarligi va darajasini ko'zdan kechirib olishdi, qo'shish joiz bo'lsa, xalqaro miqyosda tajriba almashindi... Viloyat federaciyasi raisi to'g'ri takidladi, mazkur xalqaro turnir har tomonlama foydali bo'ldi. Yangi nomlar, chempionlar kashf etildi. Polvonlar katta-katta solimlarga, sportsevar sirdaryoliklar esa olam-olam taassurotlarga ega chiqishdi. Eng asosiysi, xayrli tashabbus qanot yozdi, bardavom bo'ldi.

Yuqori saviyada tashkil etilgan xalqaro turnir davomida faxriy polvonlar qadrlandi, diydordan ko'ngillar yayradi. SHuningdek, Sirdaryoning faxriga aylangan alplar, polvon bobolar xotirlandi, ularning-da, pok ruhlari shod bo'ldi...

Ilhom RAHMONOV tayyorladi