Dmitriy Bocharov yo'llanma uchun ichki kurash haqida: "Raqobat anchagina kuchli edi"

Iyun oyida mamlakat birinchiligidagi g'oliblikdan so'ng ushbu yo'llanma terma jamoaning yosh sportchisi Dmitriy Bocharovga ishonib topshirildi.

O'zbekiston velosiped sporti federaciyasi matbuot xizmati Dmitriy Bocharov bilan suhbat uyushtirib, bir qancha savollarga javob oldi.

— Siz o'zingizning 22 yoshingizda Olimpiadada debyut qilyapsiz. Faoliyatini 2015 yilda boshlagan velosportchi uchun bu qanchalik erta yoki kech hisoblanadi?

— Bu juda yaxshi natija, menimcha. Har holda, men shu kungacha velosport bahslarida qatnashgan o'zbeklar orasida eng yosh atletman.

— Parijdagi Olimpiadada ishtirok etishingiz musobaqa startiga deyarli bir oy qolganida aniq bo'ldi. Unga tayyorgarlik qay darajada bo'lmoqda?

— To'g'ri, Olimpiadaga oz vaqt qoldi. Lekin men bu musoboqa uchun butun faoliyatim davomida tayyorgarlik ko'rib kelmoqdaman. Hozirgi vaqtda esa mashg'ulotlarni ko'paytirgan holda yuqori darajada olib bormoqdaman. Hozir olib borayotgan mashg'ulotlarim Olimpiada vaqtida jismoniy holatimni maksimal darajaga olib chiqishi uchun mutaxassis-murabbiylar tomonidan tuzib chiqilgan.

— Umuman olganda, Parijga borish hayolingizga kelganmidi? Har holda bu yo'lda sizdan tashqari uch nafar velosportchi raqobatga kirishgan edi.

— Parij Olimpiadasida ishtirok etaman, deb o'ylamagan edim. Lekin shu kungacha aynan shu maqsad ila shug'ullanib keldim. To'g'ri, raqobat anchagina kuchli edi. Lekin biz bir jamoamiz va barchamizning maqsadimiz bir narsaga yo'llangan edi. Bu ham bo'lsa Olimpiadada O'zbekiston bayrog'ini yuqoriga ko'tarib, butun jahon oldida o'z madhiyamizni yangratish. Bu imkoniyat menga berilganidan juda xursandman!".

— O'zingizning debyut Olimpiadangizdan nimalar kutyapsiz?

— Bu mening ilk Olimpiadam. Davlatimiz prezidenti SHavkat Miromonovich Mirziyoev, shuningdek, Tanzila Kamolovnaga bizga bergan yordami va bildirgan ishonchi uchun rahmat aytmoqchiman. Qolaversa, menga yaqindan yordam ko'rsatgan barcha insonlarga ham minnatdorchilik bildiraman. Maqsadim — albatta jamoamning ishonchini oqlashdir!