Dzyudo. Olimpiya kelajagi musobaqalari start olmoqda

28-29 aprel kunlari Qashqadaryoda dzyudo bo'yicha musobaqaning hududiy bellashuvlariga start beriladi. Unda «S» guruhida Qashqadaryo, Surxondaryo va Navoiy viloyat terma jamoalari o'zaro kurash olib boradilar. Qayd etib o'tish lozimki, ular orasidan faqatgina bitta jamoa hal qiluvchi final bosqichida qatnashish huquqini qo'lga kiritadi.

Eslatib o'tamiz, respublika bo'yicha musobaqalar to'rtta mintaqaga ajratilgan holda tashkil etiladi. «A» guruhida Andijon, Namangan, Farg'ona va Toshkent viloyati terma jamoalari bahs yuritsalar, «B» guruhida Toshkent shahri, Sirdaryo, Samarqand va Jizzax viloyatlari terma jamoalari final yo'llanmasi uchun kurash olib boradilar. «D» guruhida esa Qoraqalpog'iston Respublikasi, Xorazm va Buxoro viloyati terma jamoalari o'rtasida musobaqalar tashkil qilinadi.

6-7 oktyabr kunlari bo'lib o'tadigan final bellashuvlariga Termiz shahri mezbonlik qiladi.

Milliy olimpiya qo'mitasi tashabbusi bilan asos solingan «Olimpiya kelajagi» musobaqalarini tashkil qilishdan ko'zlangan asosiy maqsad – yosh va iqtidorli sportchilarni saralab olish, joylarda sportning ommaviyligini oshirish, hududiy terma jamoalarni shakllantirish va o'quv-mashg'ulot bazalari holatini yaxshilashga qaratilgandir.

Musobaqalarning to'liq taqvimi Milliy olimpiya qo'mitasining rasmiy sayti orqali elon qilib boriladi.