Farrux Do'stov: "1:1 ham yaxshi natija. Tarkibimizda o'zgarish bo'lishi mumkin"

Ikkita o'yin yakuniga ko'ra, hisob 1:1 ko'rinishiga kelgan. Denis Istomin imkoniyatni boy berib qo'ygan bo'lsa, Sergey Fomin g'alaba qozonib, muvozanatni tikladi. 

Saytimiz muhbiri Xurshida Abdikulova bugungi bahslardan so'ng terma jamoamiz sardori Farrux Do'stovning fikrlari bilan qiziqdi. 

- Istominning mag'lubiyatiga sabab nima deb o'ylaysiz? 

- Istomin qo'lidan kelgan barcha ishni qildi, unda matchbol ham bor edi. O'yin uch soatgacha cho'zildi. U g'alabaga yaqin edi. Denis 36 yoshda va tiklanish jarayoni ham uzoq kechmoqda. Bu narsa unga tasir qilmoqda. U yutishi ham mumkin edi, ammo bu sport.

- Ertangi o'yinga uning jismoniy holati qanday bo'ladi? 

- Bugun buni yana muhokama qilamiz va ertalab bu borada yakuniy qarorni aytamiz. Tarkibda o'zgarish bo'lishi mumkin. 

- Yaponiya yurtimizga kuchli tarkib bilan kelmagan. Bu O'zbekiston terma jamoasini mensimaganlikdanmi? 

- Men bunday demagan bo'lardim. Ular terma jamoa safida "Devis kubogi"dan ko'ra, o'zlarining yakkalik musobaqalarini asosiy hisoblashadi. Ularda shuningdek jarohatlar ham bor edi. Ular yaqinda US Open'da ham ishtirok etishdi. Masofa ham uzoq. 

1:1 ham yaxshi natija. Ertaga nasib qilsa juftlik va yakkalik o'yinida g'alaba qozonamiz. 

- Denis Istomindan so'ng afsuski, yosh tennischilarimiz ATP darajasidagi turnirlarga chiqa olishmayapti. Bu nima bilan bog'liq? 

- Yaxshi savol. Fikrimcha, ular turnirlarda ko'p o'ynashmayapti. Amaliyot kam. Musobaqalarga borish uchun moliyaviy imkoniyatlar ham kam. Avvallari imkoniyatlar bor edi, yordam berib turishardi. Hozir esa uyda mashg'ulotlar qilib yurishibdi. Bunday holatda kuchayish qiyin, ayniqsa tennisda.