FIDE Freestyle Chess Jahon chempionati. Abdusattorov Karlsenga, Sindarov Ergaisiga qarshi o'ynadi

O'z tarixida ilk bor o'tkazilayotgan ushbu musobaqada grossmeysterlarimiz Nodirbek Abdusattorov va Javohir Sindarov ham ishtirok etyapti. Saralash bahslarida kuchli to'rtlikdan joy olib, 1/2 finalga yo'l olgan Abdusattorov final chiptasi uchun norvegiyalik afsona Magnus Karlsenga qarshi dona surdi. Dastlabki ikki partiyada kuchlar teng keldi. Uchinchi va to'rtinchi partiyalarda esa Magnus g'alaba qozonib, umumiy 3:1 hisobi bilan finalga yo'l oldi. 

Ikkinchi 1/2 finalda amerikalik Fabiano Karuana germaniyalik Vinsent Keymerdan 2,5:1,5 hisobida ustun keldi. Bugun finalda Magnus Karlsen Fabiano Karuanaga qarshi jahon chempionligi uchun bahs olib boradi. Nodirbek Abdusattorov esa Vinsent Keymer bilan uchrashuvda 3-o'rin taqdirini hal qiladi. 

Afsuski, saralash bosqichini omadsiz o'tkazgan Javohir Sindarov 5-o'rin uchun kechgan uchrashuvda hindistonlik Arjun Ergaisiga 1:3 hisobida imkoniyatni boy berib qo'ydi. Endi u bugun 7-o'rin uchun kechadigan bahsda amerikalik Levon Aronyan bilan hisob-kitob qiladi. 

Malumot uchun, FIDE Freestyle Jahon chempionati g'olibi 100 000, finalchi 60 000, uchinchi o'rin sohibi 40 000 dollar mukofot puliga ega bo'ladi. To'rtinchi o'rin 30 000, beshinchi o'rin 25 000, oltinchi o'rin 20 000, ettinchi o'rin 15 000, so'nggi o'rin egasi esa 10 000 dollarni qo'lga kiritadi. Nodirbek va Javohir bugun mos ravishda 40 000 hamda 15 000 dollar uchun kurashadi.