Fomin Ust-Kamenogorskda bosh sovrin uchun kurashni davom ettiryapti

Mukofot jamg'marasi 15 ming dollarni tashkil etgan turnirda uch nafar tennischimiz o'z ishtirokini boshlagandi. Amir Milushev va Maksim SHin ilk davradayoq mag'lubiyatga uchradi. Sergey Fomin esa ikki g'alaba evaziga 1/4 finalga yo'l oldi. 

Mamlakatimizning ikkinchi raketkasi ilk davrada yaponiyalik SHinji Xazavani 6/2, 6/2 hisobida taslim etgandi. Ikkinchi bosqichda esa yana bir kunchiqar yurt vakili Kazuma Kavachiga chiqish eshiklari ko'rsatildi - 6/2, 6/2.    

Hamyurtimiz turnirda ikkinchi raqam ostida tasniflangan bo'lib, dunyoning 632-raketkasi bo'lib turibdi. Xazava ATP reytingida 1235, Kavachi esa 1183-pog'onadan joy olgan. Endi Fomin 1/4 finalda rossiyalik Savriyan Danilovga qarshi kortga chiqadi.