Freestyle Chess Grand Slam. Abdusattorov va Sindarov ishirokidagi har ikki bahs bir xil natija bilan yakunlandi

Bugun musobaqada final uchrashuvlari start oldi. Turnir bosh sovrini uchun amerikalik Fabiano Karuana musobaqa kashfiyotiga aylangan germaniyalik Vinsent Keymerga qarshi bahs olib boryapti. Keymer 1/2 finalda norvegiyalik afsona Magnus Karlsenni shov-shuvli tarzda 1,5:0,5 hisobida mag'lubiyatga uchratdi. Dunyo reytingida ikkinchi o'rinda borayotgan Karuana esa 7 ta partiya davom etgan murosasiz kurashda hamyurtimiz Javohir Sindarovdan 4:3 hisobida ustun kelgandi. 

Uchinchi o'rin uchun kechayotgan qarama-qarshilikda Sindarov Magnus Karlsen bilan hisob-kitob qilmoqda. Saralash bosqichidagi o'zaro uchrashuvda Javohir nomdor raqibini mag'lubiyatga uchrata olgandi. Biroz avval yakuniga etgan 3-o'rin uchun bahsning ilk partiyasida Sindarov oq donalarda o'ynashiga qaramay, tajribali Magnusga imkoniyatni boy berdi. 

Afsuski, 5-o'rin uchun kechayotgan bahsda Nodirbek Abdusattorov ham amerikalik Hikaru Nakamuraga yutqazib qo'ydi. Reytingning uchinchi pog'onasida borayotgan Hikaru qora donalarda harakat qilganiga qaramay, muhim g'alabani qo'lga kiritdi. Ertaga shaxmatchilar o'rtasidagi ikkinchi uchrashuvlar o'tkaziladi va unda grossmeysterlarimiz qora donalarda vaziyatni o'nglash uchun urinib ko'rishadi. Kamida durang natija raqiblarimizning umumiy g'alabasiga kifoya qiladi. 

Malumot uchun, chempion 200 000, finalchi 140 000 dollarni qo'lga kiritadi. Sindarov 100 000, Abdusattorov esa 50 000 AQSH dollari uchun kurashyapti.