Freestyle Chess Grand Slam. Javohir Sindarov bugun Magnus Karlsenga qarshi ikkinchi o'yinini o'tkazadi

Sovrin jamg'armasi 750 000 AQSH dollarini tashkil qiluvchi musobaqada hamyurtimiz Javohir Sindarov 3-o'rin uchun kurash olib borayotgani haqida xabar qilgandik. Hamyurtimizga dunyoning birinchi raqamli grossmeysteri Magnus Karlsen raqiblik qilmoqda. 

Kecha shaxmatchilar o'rtasidagi birinchi partiya bo'lib o'tdi. Unda Javohir Sindarov oq donalarda harakat qilib, imkoniyatni boy berib qo'ygandi. Bugun mazkur qarama-qarshilikning ikkinchi partiyasi o'tkaziladi. 

Agar Javohir g'alabaga erishadigan bo'lsa, bahs tay-brekkacha cho'ziladi va Sindarovda 3-o'rin uchun imkoniyat paydo bo'ladi. Durang yoki mag'lubiyat hamyurtimiz turnirni 4-o'rinda tugatishini taminlaydi. 

SHuningdek, Nodirbek Abdusattorov 5-o'rin uchun dunyo reytingida uchinchi o'rinni egallab turgan Xikaru Nakamuraga qarshi bahs olib bormoqda. U ham kecha oq donalarda tajribali o'zidan 17 yosh katta raqibiga imkoniyatni boy bergandi.

Bosh sovrin uchun kechayotgan finalning dastlabki uchrashuvida yana kutilmagan natija qayd etildi. Allaqachon turnir kashfiyotiga aylanib ulgurgan germaniyalik Vinsent Keymer dunyoning ikkinchi raqamli shaxmatchisi amerikalik Fabiano Karuanani mag'lubiyatga uchratdi.