Garbin Mugurusa WTA Yakuniy turniri chempioni!

Turnir finalida ispaniyalik Garbin Mugurusa va estoniyalik Anett Kontaveyt bosh sovrin uchun bahs olib borishdi.

1 soatu 39 daqiqa davom etgan uchrashuvda jahonning beshinchi raketkasi 28 yoshli Garbin WTA reytingida sakkizinchi o'rinni egallab turgan 25 yoshli Anettni 6/3, 7/5 hisobida mag'lub  etib, WTA Yakuniy turniri chempioniga aylandi. Sportchilarning o'zaro uchrashuvlarida ispaniyalik tennischi ustunlikni saqlab qoldi - 4:2.

Bu Mugurusaning WTA Finals'dagi birinchi unvoni hisoblanadi. SHuningdek, ushbu chempionlik Mugurusa uchun mavsumdagi uchinchi va faoliyatidagi o'ninchi sovrindir. Bu g'alaba unga 1 570 000 dollar mukofot puli va 1 375 reyting ochkosini keltirdi.

Garbin yilning Yakuniy turnirida g'olib chiqqan birinchi ispaniyalik ayol tennischidir. Ushbu muvaffaqiyat orqali Mugurusa mavsumni jahonning uchinchi raketkasi sifatida yakunlaydi.