Grenke Freestyle Chess Open. Javohir Sindarov g'alaba bilan boshladi, Magnus Karlsen ham!

Bir nechta guruhda o'tkazilayotgan musobaqaning kuchlilar jam bo'lgan A guruhida grossmeysterimiz Javohir Sindarov ham o'z mahoratini namoyish etmoqda. Kecha hamyurtimiz 1-turda qora donalarda germaniyalik Detlev Volterni mag'lubiyatga uchratdi. 

Musobaqaning birinchi raqamli ishtirokchisi Magnus Karlsen oq donalarda mezbonlar vakili Vinzens Xillermanndan ustun keldi. Birinchi turda Fabiano Karuana, Uesli So, Levon Aronyan (hammasi AQSH), Arjun Ergaisi (Hindiston), Maksim Vashe-Lagrav (Franciya), SHaxriyar Mamadyarov (Ozaraybjon), Yan Nepomnyashiy (FIDE) singari taniqli grossmeysterlar zafar quchishdi. 

Grenke Freestyle Chess Open musobaqasining mukofot jamg'armasi 225 000 evroni tashkil etadi. CHempion 60 000 evro bilan birga Las-Vegasda o'tkaziladigan Freestyle Chess turnirida qatnashish huquqini qo'lga kiritadi. Ikkinchi o'rin sohibi 40 000, uchinchi o'rin egasi 30 000 evroga ega bo'ladi. Top-10`talikni yakunlab bergan shaxmatchi 3000 evroga ega chiqadi. 

Bugun turnirning 2-turida Javohir Sindarov oq donalarda germaniyalik Yonas Rosnerga qarshi bahs olib boradi. Magnus Karlsen qora donalarda chexiyalik Vaslav Finek bilan hisob-kitob qiladi.