Grenke Freestyle Chess Open. Javohir Sindarovda g'alaba, Magnus Karlsenda yuz foizlik natija!

Bir nechta guruhda o'tkazilayotgan musobaqaning kuchlilar jam bo'lgan A guruhida grossmeysterimiz Javohir Sindarov ham muvaffaqiyatli odimlayapti. Kecha hamyurtimiz o'tkazilgan har ikki tur uchrashuvida g'alabaga erishdi. U 6-turda oq donalarda polshalik Mase Klekovskini mag'lubiyatga uchratgandi. Ettinchi turda esa qorada donalarda o'ynaganiga qaramay, hindistonlik grossmeyster Aryan CHopradan ustun keldi. 

Sakkizinchi tur oldidan Sindarov 5,5 ochko bilan 5-o'ringa ko'tarilib oldi. To'rtinchi pog'onadan joy olgan gruziyalik Baadur Jobavada ham 5,5 ochko bor. Etti uchrashuvning barchasida g'alaba qozongan norvegiyalik Magnus Karlsen yuz foizlik ko'rsatkich bilan turnir jadvalida yakka peshqadamlik qilyapti. Kuchli uchlikni 6 ochkodan jamg'argan Rauf Mamedov va Andrey Esipenko yakunlab bergan.   

Bugun musobaqaning 8-turida Javohir Sindarov oq donalarda o'zi singari 5,5 ochkoga ega bo'lib turgan germaniyalik Frederik Svanga qarshi bahs olib boradi. Magnus Karlsen qora donalarda Rauf Mamedov bilan hisob-kitob qiladi.  

Grenke Freestyle Chess Open musobaqasining mukofot jamg'armasi 225 000 evroni tashkil etadi. CHempion 60 000 evro bilan birga Las-Vegasda o'tkaziladigan Freestyle Chess turnirida qatnashish huquqini qo'lga kiritadi. Ikkinchi o'rin sohibi 40 000, uchinchi o'rin egasi 30 000 evroga ega bo'ladi. Top-10`talikni yakunlab bergan shaxmatchi 3000 evroga ega chiqadi.