Istomin faoliyatini yakunlayaptimi?

U 2-3 fevral kunlari "Devis kubogi" doirasida O'zbekiston terma jamoasini Polshaga qarshi o'yinda sardor sifatida boshqaradi.

Tennischi mazkur o'yinlar oldidan o'z fikrlari bilan o'rtoqlashdi.

- Uchrashuv oldidan fikrlaringiz qanday? Polsha tarkibi va o'yinchilar holati?

"Ha, Polsha juda jiddiy jamoa. Ulardagi birinchi raqamli tennschi dunyo reytingida top-10da turadi. Biz uchun juda qiyin o'yin. Lekin biz o'z yigitlarimizga va kuchimizga ishonamiz. Va aytishganidek: "o'z uyingda devorlar ham yordam beradi". G'alaba qozonish uchun qo'limizdan kelgan barcha ishni qilamiz".

- Jamoaning so'nggi o'yinlarida sardor sifatida boshlab chiqdingiz. Bu safar ham kapitan rolidamisiz?

"Bu hozircha sir bo'lib qoladi".

- O'z faoliyatingiz haqida nima deya olasiz? Bo'lajak turnirlar haqida

"Yo'q, men hali rasman bo'lmasa-da, faoliyatimni yakunladim. "Devis kubogi"da ham o'ynasam, bu mening so'nggi o'yinlarim bo'ladi".

- O'zbekiston terma jamoasi tarkibi haqida nima deya olasiz?

"Yigitlar tayyor. Sergey Fomin Turkiyada o'zining shaxsiy murabbiyi bilan shug'ullandi. Mavsum oldidan 2,5 oy mashg'ulot o'tkazdi. Humoyun Germaniyada mashg'ulot qilib, keyin Qatarda ikkita turnirda ishtirok etdi va birida chempion, ikkinchisida vice-chempion bo'ldi. Ularning ikkisi ham yaxshi formada. Bundan tashqari, ikki yosh tennischimiz ham (SHin, Milushev) Turkiyada shug'ullandi. Hamma formada va o'yinga tayyor", - dedi Istomin.