Istomin vs Jokovich. Oldinda oltinchi to'qnashuv

Denis Istomin bugun xorvatiyalik Ivan Dodigni 4 setda (6:1, 6:4, 3:6, 7:5) mag'lub etishga erishdi. Endi hamyurtimiz serbiyalik Novak Jokovichga qarshi kortga chiqadi.

Novak Jokovich "Australian Open" musobaqasida olti marta (2008, 2011, 2012, 2013, 2015 va 2016 yillar) chempion bo'lgan. Yani Istomin ertaga musobaqaning amaldagi chempioniga qarshi o'yin o'tkazadi.

Serbiyalik tennischi "Katta dublg'a" turkumiga kiruvchi barcha musobaqalarda g'olib chiqa olgan. Jokovich uch marta "Uimbldon", ikki bor "US Open" va bir marta "Rolan Garros"da zafar quchgan.

Faoliyati davomida Novak yakkalik bahslarida jami 67ta musobaqada chempionlikni nishonlagan. 29 marta finallarda mag'lub bo'lgan.

Istomin hamda Jokovich bugunga qadar 5 marta to'qnash kelishgan. Ularning barchasida serbiyalik tennischi g'olib chiqqan. Denis Istomin bu raqibga qarshi bahslarda faqat bitta setda g'alabaga erishganini ko'rish mumkin.

Jokovich - Istomin to'qnashuvlari:
2010 yil - "Australian Open" (6:1, 6:1, 6:2)
2011 yil - "Mayyami Masters" (6:0, 6:1)
2013 yil - "Kanada Masters" (2:6, 6:4, 6:4)
2014 yil - "Australian Open" (6:3, 6:3, 7:5)
2014 yil - "Dubai" (6:3, 6:3)

Malumot uchun, Istomin ayni paytda ATP reytingida 117-pog'onada bormoqda. Uning ertangi raqibi esa 2-o'rinda qayd etilgan.