27 dek 07:43
Yangiliklar

SHaxmat

Jahon chempionatining ilk kuni 5 ta tur o'tkazildi, ikki grossmeysterimiz Top-15`talikda, Magnus Karlsen 83-pog'onada!

Tunda AQSHning Nyu-York shahrida shaxmatning rapid va blic yo'nalishlari bo'yicha Jahon chempionati start oldi.

Dunyo birinchiligining birinchi kuni rapid bo'yicha 5 ta tur partiyalari o'ynaldi. Jahonning ko'zga ko'ringan shaxmatchilari qatori O'zbekiston terma jamoasining etakchi grossmeysterlari ham sovrinli o'rinlar uchun bahslarga kirishishdi. Blic va rapid bo'yicha amaldagi jahon chempioni Magnus Karlsen ilk kungi uchrashuvlardayoq jiddiy qarshiliklarga duch keldi. Norvegiyalik shaxmat yulduzi 5 imkoniyatdan 2,5 ochko jamg'arib, qo'shimcha ko'rsatkichlarga ko'ra 83-o'rinni egallab turibdi. U 1 g'alaba, 1 mag'lubiyat va 3 ta durang natija qayd etgan.

Hamyurtlarimiz orasidan Nodirbek Abdusattorov (2740) hozircha eng yaxshi ko'rsatkichga ega bo'lib turibdi. Jahon chempionatida 9-raqam ostida tasniflangan Nodirbek 4 ta partiyada g'alaba qozondi va faqat 3-turda qora donalarda o'ynab, amerikalik Aleksandr Lenderman (2621)ga imkoniyatni boy berib qo'ydi. Ioan-Kristian Kirila (Ruminiya, 2500), Andrey Volokitin (Ukraina, 2569), Aleksandr Raxmanov (FIDE, 2561) va Xayk Martirosyan (Armaniston, 2609) taslim etildi. Abdusattorov 5 imkoniyatdan 4 ochko jamg'arib, qo'shimcha ko'rsatkichlarga ko'ra 9-o'rinni band etgan. Beshinchi o'rindagi hindistonton Raunak Sadhvanida ham 4 ochko bor.

Yana bir grossmeysterimiz Javohir Sindarov ham 5 imkoniyatdan 4 ochko to'pladi. Faqat u qo'shimcha ko'rsatkichlarga ko'ra 3 g'alaba va 2 durang bilan 14-pog'onadan joy olgan. Hali yutqazmadi va bu ham yaxshi natija. Sindarov Merab Gagunashvili (Gruziya, 2460), Luka Moroni (Italiya, 2525) va Tanitoluva Adevumi (AQSH, 2262)ni mag'lub etdi. Benjamin Bok (Niderlandiya, 2596) va Samuel Sevian (AQSH, 2614) bilan durang o'ynadi.

Qolgan shaxmatchilarimizning ishtirokiga to'xtaladigan bo'lsak, SHamsiddin Vohidov 3 ochko bilan qo'shimcha koeficentlarga ko'ra 70, Jahongir Vohidov 2,5 ochko bilan 79, Muhiddin Madaminov 2 ochko bilan 139-pog'onada bormoqda.

Beshinchi turdan so'ng to'rt nafar ishtirokchi - Volodar Murzin (FIDE, 2588), SHant Sargsyan (Armaniston, 2601), Lener Dominges (AQSH, 2699) va Daniel Narodickiy (AQSH, 2638) 4,5 ochkodan to'plab, qo'shhokimlik qilishyapti.