Kamondan otish. Turkiyadan tashrif buyurgan murabbiy ishtirokida mahorat darslari tashkil etildi

Ikki tomon o'rtasidagi kelishuvga ko'ra, o'zbekistonlik sportchilar Turkiyada qo'shma o'quv-mashg'ulot yig'inlarida ishtirok etadilar. O'z navbatida turkiyalik murabbiylar ham O'zbekistonga tashrif buyurib, bu erdagi hamkasblari bilan tajriba almashish, master-klass o'tkazib berishlari lozim edi.

Bundan bir necha kun oldin Turkiyada faoliyat olib borayotgan murabbiy Vladimir Lekvishvili Milliy olimpiya qo'mitasiga tashrif buyurgan va Bosh kotib Jasur Matchanov bilan uchrashib, O'zbekistonda kamondan otish sport turini rivojlantirish bo'yicha bir qator muhim masalalarni muhokama qilgandi.

Murabbiy tashrifi davomida Samarqandda MOQ sovrini uchun o'tkazilayotgan O'zbekiston kubogiga ham bordi. U erda Lekvishvili terma jamoamiz uchun munosib nomzodlarni saralab olishda murabbiylarimizga yordam bermoqda. Bugun Samarqandda Vladimir Lekvishvili ishtirokida o'zbekistonlik murabbiylar uchun mahorat darslari tashkil etildi. Olimpiya o'yinlari, jahon va Evropa chempionati sovrindorlarini tarbiyalagan murabbiy o'z darslari davomida mashg'ulotlar samaradorligini oshirish, muvaffaqiyatli ishtirok omillari haqida gapirib berdi. SHuningdek, o'zbekistonlik sportchilar ishtirokidagi mashg'ulotlarni kuzatgan murabbiy bu borada o'z tahlilini, hulosalarini malum qildi.

Eslatib o'tamiz, kamondan otish bo'yicha Milliy olimpiya qo'mitasi sovrini uchun Samarqandda o'tkazilayotgan O'zbekiston kubogi ertaga nihoyasiga etadi.