Karlsen va Goryachkina Rapid bo'yicha jahon chempioni bo'lgan musobaqada shaxmatchilarimiz qanday natija qayd etishdi?

Ushbu nufuzli musobaqada dunyoning 70 davlatidan kelgan 394 nafar shaxmatchi ishtirok etyapti. O'zbekiston terma jamoasi safida 14 nafar shaxmatchimiz yurtimiz sharafini himoya qilmoqda. 

Afsuski, Rapid bahslarida hamyurtlarimizning hech biri sovrinli o'rinlardan joy ola bilmadi. SHaxmatchilarimiz orasida eng yaxshi natijaga Javohir Sindarov erishdi. Jahon kubogi g'olibi 13 imkoniyatdan 9 ochko jamg'arib, qo'shimcha ko'rsatkichlarga ko'ra 7-o'rinni egalladi. Nodirbek Abdusattorov 8,5 ochko to'pladi va 23-o'rin bilan kifoyalandi. 

So'nggi 13-turda Javohir Sindarov oq donalarda rossiyalik Andrey Esipenko bilan murosaga keldi. Nodirbek Abdusattorov qora donalarda boshqa bir rus grossmeysteri Denis Lazavik bilan murosaga keldi. SHamsiddin Vohidov, Humoyun Begmuratov, Muhammadzohid Suyarov va Jahongir Vohidov ham so'nggi turda durang natija qayd etdi. Nodirbek Yakubboev va Muhiddin Madaminov qora donalarda o'ynaganliklariga qaramay, raqiblarini taslim etdi.    

O'zbekiston ayollar terma jamoasi vakilalaridan eng yaxshi natija Afruza Hamdamovada, u 11 imkoniyatdan 7 ochko to'pladi va qo'shimcha ko'rsatkichlarga ko'ra 22-pog'onadan joy oldi. Gulruhbegim Tohirjonova 6,5 ochko jamg'ardi va 31-o'ringa joylashdi. Ayollar o'rtasidagi rapid bahslarida rossiyalik Aleksandra Goryachkina chempionlik shohsupasiga ko'tarildi. 

Co'nggi kungi bahslarni ko'tarinki kayfiyatda o'tkazgan Magnus Karlsen 10,5 ochko bilan muddatidan oldin rapid bo'yicha jahon chempioniga aylandi. Rossiyalik Vladislav Artemev 9,5 ochko bilan qo'shimcha ko'rsatkichlarga ko'ra 2-o'rinni egalladi. Hindistonlik Arjun Ergaisi oxirgi turda rossiyalik Aleksandr SHimanovni mag'lub etgani ortidan 9,5 ochko bilan kuchli uchlikdan joy oldi. 

O'zbekiston shaxmatchilarining Rapid bahslaridagi yakuniy natijalari:

Erkaklar:

1. Javohir Sindarov – 9 ochko, 7-o'rin

2. Nodirbek Abdusattorov – 8,5 ochko, 23-o'rin

3. Muhiddin Madaminov – 7,5 ochko, 65-o'rin

4. Nodirbek Yakubboev – 7,5 ochko, 72-o'rin

5. Jahongir Vohidov – 7 ochko, 96-o'rin

6. Humoyun Begmuratov – 7 ochko, 99-o'rin

7. SHamsiddin Vohidov – 7 ochko, 101-o'rin

8. Muhammadzohid Suyarov – 6,5 ochko, 143-o'rin

Ayollar:

1. Afruza Hamdamova – 7 ochko, 22-o'rin

2. Gulruhbegim Toxirjonova – 6,5 ochko, 31-o'rin

3. Umida Omonova – 6 ochko, 60-o'rin

4. Madinabonu Xalilova – 5 ochko, 95-o'rin

5. Guldona Karimova – 4,5 ochko, 102-o'rin

6. Nilufar Yakubbaeva – 4,5 ochko, 116-o'rin