Kasper Ruud - uchinchi bor Geneva Open g'olibi!

Musobaqa bosh sovrini Kasper Ruudga nasib etdi. Dunyoning ettinchi raketkasi uchinchi marotaba Gonet Geneva Open g'olibiga aylandi. Bu safar norvegiyalik tennischi final uchrashuvida ATP reytingida 44-pog'onada borayotgan chexiyalik Tomash Maxachni mag'lubiyatga uchratdi - 7/5, 6/3.

Maxach dunyoning birinchi raketkasi Novak Jokovichni musobaqadan chiqarib yuborishga muvaffaq bo'lgan edi. Bir soatu 47 daqiqa davom etgan final bahsida Ruud 2, Maxach 3 ta eys zarbasini amalga oshirgan. Qo'shxatolar Tomash "foydasi"ga - 3 ga 0. Breyklar bo'yicha ustunlik esa Ruud tomonda bo'ldi - 3 ga 1!

Gonet Geneva Open turniridagi muvaffaqiyatli ishtirok Ruudga 250 reyting ochkosi hamda 88,125 evro mukofot puli keltirdi. Maxach esa 150 ochko va 51,400 evro ishlab oldi. Kasper faoliyatidagi 12-sovrinini qo'lga kiritdi.