Kessler bosh sovrinni AQSHda olib qoldi, bu uning ilk tituli bo'ldi

Tennis in the Land bosh sovrini mezbonlar vakilasi Makkartni Kesslerga nasib etdi. U faoliyatidagi ilk sovrinni o'z vatanida qo'lga kiritdi. WTA reytingida 98-o'rinni egallab turgan Makkartni final uchrashuvida dunyoning 23-raketkasi, braziliyalik Beatris Xaddad Mayya ustidan irodali g'alabaga erishdi - 1/6, 6/1, 7/5.

Bu tennis malikalarining o'zaro o'tkazgan ilk uchrashuvi edi. Ikki soatu 7 daqiqa davom etgan bahsda Kessler 3, Xaddad Mayya 4 ta eys zarbasini amalga oshirgan. Ikkala tennischi ham 4 tadan qo'shxatoga yo'l qo'ygan. Breyklar bo'yicha ustunlik amerikalik tennischi tomonida bo'ldi - 5 ga 4! 

Tennis in the Land turniridagi muvaffaqiyatli ishtirok Kesslerga 250 reyting ochkosi hamda 35,250 AQSH dollari miqdorida mukofot puli keltirdi. Bu u uchun faoliyatidagi ilk sovrin ham bo'ldi.