27 okt 19:47
Yangiliklar

Dzyudo

Lutfullaev - “Katta Dubulg'a” turniri sovrindori!

Bugun Birlashgan Arab Amirliklari poytaxti Abu-Dabi shahrida dzyudo bo'yicha “Katta Dubulg'a” turkumiga kiruvchi nufuzli turnir start oldi.

Quvonarlisi, musobaqaning ilk kuniyoq terma jamoamiz g'aznasi medal bilan boyidi. -60 kg vazn toifasida tatamiga chiqqan SHarofiddin Lutfullaev bronza medaliga sazovor bo'ldi.

Lutfullaev ukrainalik Artyom Lisyuk, gruziyalik Luxumi CHxvimianini mag'lubiyatga uchratdi. Yarim finalda bo'lajak chempion gruziyalik Amiran Papinashviliga yutqazib qo'ydi. Bronza uchun kechgan bahsda esa qozog'istonlik Eldos Smetovdan ustun keldi.

Ushbu vazn toifasida o'z imkoniyatini sinovdan o'tkazgan yosh dzyudochimiz Dilshodbek Baratov BAA vakili Ahmad Al Naqbini engdi. Lekin ikkinchi bosqichda aynan Eldos Smetovga imkoniyatni boy berdi.

Ertaga hamyurtlarimizdan -73 kg vazn toifasida Hikmatullo To'raev hamda -100 kg vaznda Alisher Xudoyberdiev medallar uchun bahslarga kirishishadi. Abu-Dabi turniri Tokio-2020 Olimpiadasiga qimmatli reyting ochkolarini taqdim etishi bilan ahamiyatlidir.