"Manama Challenger 80". Sultonov finalda kortga chiqdi

Mukofot jamg'armasi 52 080 AQSH dollarini tashkil etuvchi "Manama Challenger 80" turnirida hamyurtimiz Humoyun Sultonov ham o'z imkoniyatini sinovdan o'tkazdi. Sultonov saralashning yarim finalida Saudiya Arabistoni tennischisi Omar Ahmedni mag'lub etgandi. 

Afsuski, u saralashning final uchrashuvida chexiyalik Marek Gengelga imkoniyatni boy berib qo'ydi. Saralash turnirining birinchi raketkasi bo'lgan Sultonov 127 daqiqa davom etgan bahsda evropalik raqibiga 6/4, 6/7(2), 0/6 hisobida yutqazdi va endi bor etiborini juftlikdagi ishtirokiga qaratadi.  

Taqqoslash uchun, Humoyun Sultonov ATP reytingida 391, Marek Gengel esa 434-o'rinni egallab turibdi. Hamyurtimiz yakkalikdagi ishtirokini yakunlagan bo'lsa, chexiyalik tennischi asosiy to'r bahslariga yo'l oldi.  Uning birinchi davradagi raqibi dunyoning 288-raketkasi, portugaliyalik Gonsalu Oliveyra bo'ladi.