Maqsad-manziliga intilgan hamda bugun tavallud ayyomini nishonlayotgan ustoz!

Uychi tuman 1-son bolalar-o'smirlar sport maktabidagi sport turlari qatoridan belbog'li kurash ham mustahkam o'rin olgan bo'lib, mazkur sport turidan 172 nafar o'g'il-qizlar mahoratini oshirib kelmoqda. Tajribali va jonkuyar murabbiy Baxtiyor Turg'unpo'latovning guruhida mashg'ulotlarga zo'r berayotgan 36 nafar sportchi-o'quvchilarning ko'pchiligi chempion va sovrindorlar sanalishadi. 

2006 yildan buyon belbog'li kurash bo'yicha yoshlarga ustozlik qilib kelayotgan B.Turg'unpo'latov ustozi Nematjon To'ychievdan o'rgangan belbog'li kurash sirlarini bugun o'z shogirdlariga zo'r ishtiyoq bilan o'rgatishi natijasida yuz ellik nafardan ziyod shogirdlari O'zbekiston chempionatlarining oltin va kumush medallarini qo'lga kiritishga muvaffaq bo'lishgan. Yigirmaga yaqin shogirdlari Osiyo va jahon chempionatlari g'olib va sovrindorlari sanaladi. 

Asadbek Mamataliev, Jamoliddin Nematullaev, Akramjon Maxamataliev, aka-uka Hasan va Husan O'rayimov, Gulnora Nurmamatova singari iqtidorli shogirdlaridan bugun ustozning umidi katta. SHogirdlari orasida Zebo Nosirova 2018 yil dekabr oyida Rossiyaning Qozon shahridagi yoshlar o'rtasidagi jahon chempionatida birinchi o'rinni egallagan, o'tgan yili avgust oyida Olmaliq shahrida o'tkazilgan jahon chempionatida (48 kg.da) Moxigul Ibragimova ham oltin medalga sazavor bo'lgan.  

SHuningdek, Abdulahat Nosirov 57 kg. da ikkinchi, Durdona Mirzamahmudova 70 kg. da uchinchi o'rinni band etishgan. Bundan tashqari Murodjon Hamidov, Sarvar To'xtasinov, Abduqahhor Ahmadjonov, Anvar Qutbiddinov, Muxtor Ahmadjonov, Hilola Nosirova, Zilola Xabibullaeva, O'g'ilxon Ahmedova, Gavxaroy Mirzamahmudova kabi shogirdlari ham jahon chempionatlarida kuchli uchlikdan joy olishgan.  

“Xalq talimi alochisi”, belbog'li kurash bo'yicha oliy toifali murabbiy, milliy toifadagi hakam Baxtiyor Turg'unpo'latov esini taniganidan beri belbog'li kurashga oshno. Bir paytlar kurash davralarida hayqirib kurash tushgan, ko'p bor g'oliblikni tantana qilgan, raqiblariga qo'llagan usullari belbog'li kurashga bezak bo'lguday yarashganini ko'pchilik muxlislar yaxshi eslashadi.

Baxtiyor polvonning otasi Yusufjon Qodirov ham yoshlik chog'larida erkin kurash bilan shug'ullanib, respublika va xalqaro musobaqalarda ko'p bor sovrinlarni qo'lga kiritganini ko'pchilik yaxshi eslaydi. Keyinchalik shu sport turidan yoshlarga ustozlik ham qilgan. Hozirda Uychi tumanidagi 26-sonli umumiy o'rta talim maktabida jismoniy tarbiya o'qituvchisi sifatida faoliyat ko'rsatmoqda. 

Milliy belbog'li kurashni nafaqat mamlakatimizda keng ommalashishi, balki Osiyo va jahon miqyosidagi sport o'yinlarida ham doim belbog'li kurash so'zi yangrashini, shogirdlari xalqaro musobaqalarda birinchi bo'lib, YURTni ulug'lashi Baxtiyor polvonning maqsad-muddaosi sanaladi.

Darvoqe, umrini sportga bag'ishlagan Baxtiyor Turg'unpo'latov 1987 yil 2 martda Uychi tumanida tug'ilgan. Demak, bugun uning tug'ilgan kuni. Tabriklaymiz. Maqsad manzillariga etishida biz ham tilakdoshmiz!

Ilhom RAHMONOV tayyorladi