Marafonda yuksak jasorat ko'rsatgan vatandoshlarimiz munosib etirof etildi

Musobaqada ishtirokchilar marafon (42,195 km), yarim marafon (21,0975 km), ekiden (5 km+10 km+5 km+10 km+5 km+7,195 km) hamda 3km masofada tashkil qilingan poygalarda o'z omadlarini sinab ko'rishdi.

Katta marafonda Qozog'iston, Qirg'iziston, Tojikiston, shuningdek Rossiya Federaciyasi hamda mamlakatimizdan jami 76 nafar professional va havaskor sportchi o'z omadini sinab ko'rgan bo'lsa, yarim marafon bahslarida ishtirokchilar soni 529 nafarni tashkil qildi.

3 km masofaga o'tkazilgan yugurish va yurish musobaqasida esa 779 nafar ishtirokchi startga chiqdi. Bundan tashqari, ilk bora tashkil etilgan ekiden bahslarida turli vazirliklar, idoralar, korxona-tashkilotlar hamda mamlakatimizda faoliyat olib borayotgan diplomatik vakolatxonalardan jami 64ta jamoa (har bir jamoa tarkibi 6 nafar sportchidan iborat) qatnashdi. Marafonning umumiy ishtirokchilari soni qariyb 1 800 nafarga etdi va bu Toshkent Xalqaro marafoni tarixida rekord ko'rsatkichdir.

Etiborlisi, marafonda professional va sog'lom sportchilar bilan bir qatorda jismoniy imkoniyati cheklanganlar ham faol ishtirok etishdiki, bu chindan ham tahsinga loyiq. Etirof etish joiz, ular nafaqat III Toshkent Xalqaro marafonida qatnashdi, balki belgilangan marrani matonat bilan bosib o'tishdi.

Ayniqsa, marafon bahslarida asli muhandis bo'lgan Fidan Yakupovning 42 km 195 metr masofani 4 soat 21 daqiqayu 54 soniya ichida 45-bo'lib bosib o'tganligiga qoyil qolmaslikning iloji yo'q. III Toshkent Xalqaro marafoni ishtirokchilari orasida jismoniy imkoniyati cheklanganlardan Fidan yolg'iz emasdi.

III Toshkent Xalqaro marafoni tashkilotchilari shunday matonatli havaskor sportchilarni rag'batlantirishni lozim topdi.

Quyida ana shunday matonatli havaskor sportchilar bilan tanishing:

Fidan Faritovich Yakupov marraga 45-bo'lib etib kelgan. Natijasi – 4:21.54

SHuhrat Rahimberdievich Toshpo'latov yarim marafonda 332-raqam bilan ro'yxatdan o'tgan, 395 nafar ishtirokchi orasida 200-bo'lib marraga etib keldi. Natijasi – 2:04.42.

Daniil Aleksandrovich Bronskiy, 1-guruh tug'ma nogironi. Yarimmarafonda 19-raqam bilan ro'yxatdan o'tgan. Natijasi – 4:21.54

Sergey Sergeevich Uchaev 3 km masofaga o'tkazilgan poygada ishtirok etdi. 1073-raqam bilan ro'yxatdan o'tgan. Natijasi – 0:30.42.

Ushbu havaskor sportchilar O'zbekiston Respublikasi Prezidenti huzuridagi Xavfsizlik kengashi tomonidan qimmatbaho sovg'alar bilan taqdirlandi.