Monfis Rotterdamda chempionlik unvonini himoya qildi

Dunyoning to'qqizinchi raketkasi bo'lib turgan Gael Monfis hal qiluvchi final uchrashuvida reytingning 21-pog'onasidan joy olgan kanadalik 19 yoshli Feliks Ojega qarshi kortga chiqdi. Bir soatu 26 daqiqa davom etgan bahsda 33 yoshli Monfis 6/2, 6/4 hisobida g'alaba qozondi. 

Bu tennischilarning o'zaro ilk uchrashuvi edi. Gael ushbu g'alaba evaziga chempionlik unvonini himoya qildi. O'tgan yilgi finalda u shveycariyalik Sten Vavrinkadan ustun kelgan edi. ABN AMRO World Tennis Tournament musobaqasidagi muvaffaqiyatli ishtirok Monfisga 500 reyting ochkosi hamda 406,840 evro mukofot puli keltirdi.