MOQ rahbariyati to'la qayta tamirlanayotgan Jizzax OZK faoliyati bilan tanishdi

Mutasaddilarni viloyat sportni rivojlantirish boshqarmasi boshlig'i Jaloliddin O'ktamov va Jizzax OZK direktori Xurshid Atakulov kutib olishdi. SHundan so'ng mahalliy mutaxassislar MOQ rahbariyatini viloyatda jismoniy tarbiya va sport sohasida olib borilayotgan ishlar bilan tanishtirishdi.

Avval xabar berganimizdek, Qo'mita rahbariyatining bu kabi safarlari 23 may kuni Prezidentimizning sport talimini yaxshilash, iqtidorli sportchilarni saralash va ularning zaxirasini yaratish hamda murabbiylarni tayyorlash bo'yicha o'tkazgan videoselektordagi topshiriqlari asosida tashkil etilmoqda.

X.Atakulov MOQ rahbariyatini ayni paytda Investiciya dasturi bo'yicha to'laligicha qayta tamirlanayotgan Jizzax OZKning yangi loyihasi bilan tanishtirdi. Mutaxassis Kollejning yangicha qiyofasi, yotoqxona, o'quv korpuslari, quriladigan yangi zallar, kadrlarning malakasini muntazam oshirib borish rejalariga batafsil to'xtaldi. Uning so'zlariga ko'ra, kollej kelayotgan o'quv yilidan yangicha tizimda ish boshlaydi.

SHundan so'ng Yoshlar ishlari agentligi zalida viloyatdagi sport sohasining mutaxassislari bilan davlatimiz rahbarining selekciya tizimini butkul yangilash haqidagi topshirig'i asosida ishlab chiqilgan yangi reja taqdimoti bo'lib o'tdi. 

Unda taekvondo va dzyudo sport turlari misolida hudud va sektorlar kesimida tashkil etiladigan turnirlar loyihasi, murabbiy va hakamlarning malakasini oshirish bo'yicha rejalar xususida batafsil to'xtalib o'tildi va vazifalar belgilab olindi.