Mo'ynoqqa piyoda otlangan yurtdoshlarimiz Toshkentda: ular Jismoniy tarbiya va sport vazirligida bo'lishdi

Etiborlisi, 15 fevral kuni Andijon shahridan yo'lga chiqqan bu azamatlar kuniga o'rtacha 40-45 kilometr masofani bosib o'tishmoqda. Bugun sayxunobodlik yurtdoshlarimiz Eldorbek Jo'raev hamda To'lqin Usmonov Toshkent viloyati orqali o'tib poytaxtimizga etib kelishdi. Yo'l-yo'lakay ularga televidenie xodimlari hamrohlik qilishdi.

Matonatli yurtdoshlarimizni Jismoniy tarbiya va sport vazirligida vazirning birinchi o'rinbosari Ravshan Ermatov hamda OAV vakillari kutib olishdi.

“Sizlarning bu matonatingiz va jasoratingiz tahsinga loyiq, - dedi uchrashuvda Ravshan Sayfiddinovich. – Futbol hakamlari bir o'yinda o'rtacha 15-18 km masofani bosib o'tishadi. Sizlar esa bir kunda o'rtacha 40-45 km masofani ortda qoldirmoqdasiz. Albatta, Jismoniy tarbiya va sport vazirligi sizlarning bu tashabbusingizni olqishlaydi va har tomonlama qo'llab-quvvatlaydi. Ijtimoiy tarmoqlar orqali sizlarga yurtdoshlarimiz ham hayrihox bo'lishayotganini kuzatib turibman. Ishonamanki, Mo'ynoqqacha bo'lgan masofada sizlar juda ko'p yurtdoshlarimizni sog'lom turmush tarziga oshno etasizlar, bu yo'lda sizlarga kuch-quvvat tilayman”.

SHundan so'ng vazirlik nomidan E.Jo'raev va T.Usmonovlarga estalik sovg'alari topshirildi va ularga oq yo'l tilandi.

O'z o'rnida ushbu yurtdoshlarimiz samimiy qabul uchun vazirlik rahbariyatiga minnatdorlik bildirdi. Va albatta har qanday ob-havoga qaramasdan o'z maqsadlaridan aslo chekinmaslikka va nasib etsa “Navro'z” umumxalq bayramini Mo'ynoqda qoraqalpoq xalqi bilan kutib olishga harakat qilishini bildirdi.

“Kelgusidagi maqsadlarimiz – nafaqat O'zbekiston, balki xorijiy mamlakatlarni ham piyoda bosib o'tish va ona Vatanimiz bayrog'ini chet ellarda ham mag'rur hilpiratish”, - dedi o'z so'zida Eldorbek Jo'raev.