Novak Jokovich Yakuniy ATP turniri g'olibi + FOTOGALEREYA

Hal qiluvchi final uchrashuvida dunyoning birinchi raketkasi, serbiyalik Novak Jokovich ATP reytingida to'rtinchi pog'onada borayotgan italiyalik Yannik Sinnerga qarshi kortga chiqdi. Bir yuz uch daqiqa davom etgan bahsda Jokovich o'z vatandoshlari ko'z o'ngida o'ynagan mezbon tennischiga deyarli imkoniyatni qoldirmadi - 6/3, 6/3.

Novak tennischilarning o'zaro uchrashuvlaridagi hisob ustunligini mustahkamladi - 4:1. Jokovich 13, Sinner 8 ta eys zarbasini amalga oshirgan. Serbiyalik tennischi umuman qo'shxatoga yo'l qo'ymadi, italiyalikda bu ko'rsatkichni bittani tashkil etdi. Breyklar bo'yicha mutlaq ustunlik chempionda - 3 ga 0. 

Etiborlisi, guruh bosqichida ham bu ikki tennischi o'zaro to'qnash kelishgan va o'shanda Sinner g'alaba qozongandi. Jokovich Yakuniy ATP turnirining etti karra (2008, 2010, 2011, 2014, 2015, 2022, 2023) chempioniga aylandi. Bu borada u afsonaviy Rojer Federerdan o'zib ketdi va mutlaq rekordchiga aylandi. 

Turindagi muvaffaqiyatli ishtirok Novak Jokovichga 1300 reyting ochkosi hamda 4 million 411 ming 500 AQSH dollari miqdoridagi mukofot pulini keltirdi. Bu bilan u o'tgan yilgi chempionlik unvonini ham himoya qildi va mavsumni reytingi peshqadami sifatida yakunlaydi.