OCHL. Bugun Odil Ahmedov jamoasi o'ynaydi

Saudiya Arabistonining "Al Nasr" klubi o'z maydonida "Al Sadd"ni qabul qilib, qiyinchilik bilan 2:1 hisobida g'alaba qozondi. Bugun yana ikkita o'yin bo'lib o'tadi. 

Etiborimiz dastlab 16:30da boshlanadigan bahsga qaratiladi. Hamyurtimiz Odil Ahmedov faoliyat olib borayotgan "SHanxay SIPG" o'z maydonida Yaponiyaning "Urava Reds" klubi bilan bellashadi. "SHanxay SIPG" avvalgi bosqichda Janubiy Koreyaning "CHonbuk Motors" klubini musobaqadan chiqarib yubordi. "Urava Reds" esa Koreyaning boshqa bir jamoasi "Ulsan Xyunday"dan 3:0 hisobida ustun keldi. 

Xitoy Superligasining o'tgan mavsumdagi g'olibi bu yil OCHLni ham yutishni maqsad qilgan. Biroq buni amalga oshirish oson bo'lmaydi. "SHanxay SIPG"ning chorak finaldagi raqibi "Urava Reds" ancha kuchli hisoblanadi. Bu jamoa bejizga 2017 yil OCHLda zafar quchmagan. O'shanda yaponlar finalda "Al Hilol"dan ustun kelishgandi. Qizig'i shundaki, "Urava Reds" OCHLni yutgan yili yarim finalda aynan bugungi raqibini musobaqadan chiqarib yuborgan. 

Lekin biz baribir Odil Ahmedov jamoasiga muxlislik qilamiz. O'ylaymizki, bu galgi to'qnashuvda omad shanxayliklar tomonida bo'ladi.

Kechqurun soat 22:45dan boshlab Saudiya Arabistoni "El Klasikosi" guvohi bo'lamiz. CHunki bunda ikki azaliy raqiblar "Al Ittihod" va "Al Hilol" OCHL yarim final yo'llanmasi uchun dastlabki bellashuvni o'tkazishadi. "Al Ittihod" ham, "Al Hilol" o'ziga yarasha boy tarixga ega klub. "Al Ittihod" avvalgi bosqichda Eronning "Zobahan" klubidan ustun kelgan bo'lsa, "Al Hilol" Saudiya Arabistonining yana bir jamoasi "Al Ahli"ni ikki o'yin natijasiga ko'ra 4:3 hisobida mag'lub etib chorak finalga chiqdi. 

Bugungi bahs Romarino va Bafetimbi Gomisning o'zaro to'qnashuviga aylanishi kutilmoqda. Romarino o'tgan besh yil ichida OCHLda 18ta gol urishga muvaffaq bo'ldi. Bafetimbi Gomis ham to'purarlikda boshqalardan qolishmayapti va deyarli har o'yinda gol uryapti. Francuz hujumchisi hozircha bu yil OCHLda 7ta gol urdi. O'tgan mavsum esa Saudiya Arabistoni chempionatida 30ta o'yinda maydonga tushib, 21ta gol urgan. 

OCHL-2019. 1/4 final. Dastlabki uchrashuvlar

26 avgust. 22:45 

"Al Nasr" - "Al Sadd" 2:1

27 avgust. 16:30 

"SHanxay SIPG" - "Urava Reds"

27 avgust. 22:45

"Al Ittihod" - "Al Hilol"

28 avgust. 17:00

"Guangju Evergrand" - "Kashima Antlers"