O'zbekiston davlat jismoniy tarbiya va sport universitetida ijodiy imtihonlar qanday tashkil etiladi?

Xo'sh, pandemiya davrida qabul jarayonlari va imtihonlar qanday tashkil etiladi? Kirish imtihonlari kasbiy (ijodiy) shaklda o'tkaziladigan O'zbekiston davlat jismoniy tarbiya va sport universitetida abiturientlar imtihonlarni qay tartibda topshirishadi?

SHuni malum qilamizki, pandemiya davrida karantin, sanitariya-gigiena talablariga qatiy rioya etilgan holda test sinovlari bilan bir qatorda kasbiy (ijodiy) imtihon o'tkaziladigan talim yo'nalishlari uchun imtihonlar 11 iyuldan 20 iyulga qadar, alohida iqtidor talab etiladigan talim yo'nalishlari uchun 25 iyuldan 10 avgustgacha bo'lgan vaqt oralig'ida o'tkaziladi. Karantin cheklovlari davom etgan taqdirda kasbiy (ijodiy) imtihonlarni o'tkazish muddatlariga o'zgartirish kiritilishi mumkin.

O'zbekiston davlat jismoniy tarbiya va sport universitetida imtihonlar kasbiy (ijodiy) hamda kasbiy (ijodiy)+test yo'nalishida tashkil etiladi. To'liq ijodiy imtihon asosida talabalikka qabul qilinadigan yo'nalishlarda abiturientlar shu paytga qadar maxsus va umumiy jismoniy tayyorgarlikdan tashqari suzish bo'yicha ham imtihon topshirib kelishar edi. Joriy yilgi qabul mavsumida abiturientlar faqat maxsus va umumiy jismoniy tayyorgarlik bo'yicha imtihon topshiradi, suzish yo'nalishi majburiy imtihonlardan olib tashlanadi.

Ijodiy va test imtihonlari (pedagogik talim yo'nalishi) asosida talabalikka qabul qilinadigan yo'nalishlarda esa ijodiy imtihonlarning faqat bittasi (maxsus jismoniy tayyorgarlik) saqlab qolinadi va qo'shimcha test topshiriladi. Bu holatda ijodiy imtihon uchun abiturientlar maksimal 93 ball, testdan esa 96 ball jamg'arishi mumkin.

Malumot uchun, abiturientlar ijodiy imtihonlarni faqat bir kun va uzog'i bir soat ichida topshirishadi.

Jismoniy tarbiya va sport vazirligi Matbuot xizmati