O'zbekiston Milliy antidoping agentligi sportchilarimizni ogohlantirdi

Tashkilot uy sharoitida mashg'ulotlar olib borayotgan sportchilardan doping qoidalarini buzmaslik va ularga qatiy rioya qilishni tavsiya qildi.

“HURMATLI SPORTCHILAR VA MURABBIYLAR”

Malumki, butun dunyoni qamrab olgan koronavirus pandemiyasi ko'plab sport tadbirlarini, jumladan to'rtyillikning eng yirik sport musobaqalari bo'lmish 2020 yilgi Yozgi olimpiya va paralimpiya o'yinlarining o'tkazilishini keyingi yilga surilishiga sababchi bo'ldi.

Bu sportchilarimiz, ularning murabbiylari hamda tibbiyot mutaxassislariga 2021 yilda o'tkazilishi ko'zda tutilgan O'yinlarga yanada samarali va puxta tayyorgarlik ko'rishiga imkon yaratadi. Hozirda barcha sportchilarimiz uy sharoitida mustaqil ravishda, murabbiylar hamda shifokorlarning onlayn nazorati va ko'magi ostida mashg'ulotlarni bajarishda davom etishmoqda.

Aziz sportchilar Qadrli murabbiylar

Karantin davomida o'z sport qobiliyatingizni saqlash va yanada yuksaltirish maqsadida yaratilgan sharoitlardan unumli foydalanishingizni, sport tartibiga qatiy rioya qilishingizni hamda sportda taqiqlangan dori-darmonlar va moddalarni istemol qilishdan yiroq bo'lishingizni so'raymiz. Agarda sportchilarimiz orasida bu kabi dori-darmonu moddalarni qo'llab, ular qisqa muddat ichida inson tanasidan chiqib ketadi deb o'ylaydiganlar bo'lsa, ular adashishadi.

Yangilik emaski, antidoping laboratoriyalarning zamonaviy usullari yordamida 3-4, hattoki 7-8 yil avval istemol qilingan doping-moddalari aniqlanib kelmoqda. SHuning uchun ogoh bo'ling, o'z mahoratingiz va kuchingizga, halqimiz duosiga va muxlislarning olqishlab sizni qo'llab-quvvatlashiga ishoning. Adolatli sport va mardona kurashning fahrli timsoli va tarafdori bo'ling”, – deb yoziladi tashkilot bayonotida.