O'zbekistonlik yosh velosportchi qiz avgust oyida jiddiy yo'l-transport hodisasiga uchragani malum bo'ldi

"Joriy yilning 21 avgust kuni Nasiba SHerqo'zieva ishtirokida yo'l-transport hodisasi sodir bo'lgan. Voqea ro'y berganidan so'ng O'zbekiston velosport federaciyasi raisi Narbaeva Tanzila Kamalovna yosh velosportchimiz Nasiba SHerqo'zievaning salomatligidan shaxsan xabardor bo'lib, muolajalar jarayonini to'liq o'z nazoratiga olgan. Hozirda sportchining davolanishi bilan bog'liq barcha muolajalar va dori-darmonlar davlat tomonidan taminlab berilmoqda. Sportchi Respublika shoshilinch tibbiy yordam ilmiy markazida zarur muolajalarni davom ettirmoqda", deyiladi tashkilot xabarida.

OAVda tarqalgan xabarlarga ko'ra, 15 yoshli Nasiba Olimpiya zaxiralari kolleji o'quvchisi hisoblanadi. Uni 21 avgust kuni G'azalkentda "Kamaz" yuk mashinasi urib yuborgani aytilmoqda. Achinarlisi, sportchi ilk tekshiruvlar chog'ida noto'g'ri operaciyani boshdan kechirgan. Hozirda shifokorlar velosportchining hayoti uchun kurashmoqda. 

Malum bo'lishicha, Nasiba SHerqo'zievaning davolanishi bilan bog'liq jarayonda moddiy qiyinchiliklar kuzatilmoqda.