O‘zDJTSU va Elsevier: Xalqaro ilmiy aloqalar mustahkamlanmoqda

Bir yil davomida butun dunyo bo'yicha chop etiladigan barcha ilmiy maqolalarning chorak qismi ana shu kompaniyaga tegishli ilmiy jurnallarda nashr etilishi uning qamrovi va nufuziga yaqqol dalildir.

1880 yilda Amsterdam (Niderlandiya)da asos solingan mazkur nashriyot uyi o'nlab mintaqa va mamlakatlarda o'z filiallariga ega. Markaziy Osiyo ham bundan mustasno emas. Respublikamizdagi ko'plab davlat va nodavlat muassasalari Elsevier bilan hamkorlikni yo'lga qo'yishgan. Misol tariqasida Bosh prokuratura akademiyasi va “Yuksalish” umummilliy harakati Elsevier kompaniyasi bilan hamkorlik Memorandumi imzolaganini aytib o'tish mumkin. Zamon talabi bo'lgan ushbu jarayondan oliy o'quv yurtlarining ilmiy-pedagogik jamoasi ham chetda qolayotgani yo'q. 

O'zbekiston davlat jismoniy tarbiya va sport universitetida Elsevier kompaniyasining Markaziy Osiyo bo'yicha mintaqaviy direktori Aliya Ospanova, O'zbekistondagi milliy koordinatori Dilnoza Allanazarova ishtirokida o'tkazilgan uchrashuvda yuqoridagilar haqida atroflicha so'z yuritildi. Universitetning tajribali professor-o'qituvchilari va yosh tadqiqotchilari ilmiy nashrlar sohasidagi xalqaro ekspertlar bilan ochiq muloqotga kirishdilar. Talim va ilmiy-tadqiqotchilik faoliyati borasidagi aloqalarning asosiy yo'nalishlari va ularning ahamiyati xususida suhbatlashdilar.

Yaqin hamkorlikning amaliy ifodasi sifatida magistr va doktorantlar uchun A.Ospanova tomonidan “Xalqaro standartlar asosida ilmiy maqolalar tayyorlash” mavzusida master-klass o'tkazildi. Unda xalqaro standartlar asosida ilmiy maqolalar yozishning o'ziga xos jihatlari batafsil tushuntirildi, yuqori reytingli nufuzli jurnallarda chop etiladigan maqolalarni tayyorlash bo'yicha maslahat va tavsiyalar berildi.

Malumot o'rnida joriy yil oktyabr oyining boshida Elsevier kompaniyasi tomonidan Uzbekistan Research Online – O'zbekiston Respublikasining ilk raqamli recenziyalanadigan ilmiy jurnallar onlayn platformasi yaratilganini aytib o'tish joiz. Muhim jihati shundaki, bu platforma Scopus mezonlariga muvofiq ishlab chiqilgan. 

O'zbekiston davlat jismoniy tarbiya va sport universitetining Ilmiy ishlar va innovaciyalar bo'yicha prorektori Rashid Matkarimov va Elsevier kompaniyasining Markaziy Osiyo bo'yicha mintaqaviy direktori Aliya Ospanova o'rtasidagi muzokaralarda “Fan – sportga” ilmiy-nazariy jurnalining saviyasini ko'tarish, formatini zamon talablariga moslashtirish va ushbu nashrning nufuzli reytinglarga kirishini taminlash bilan bog'liq masalalarda fikr almashildi.

Bu esa Scopus xalqaro standartlariga integraciyalashish yo'lidagi navbatdagi dadil qadamdir.

Malumot uchun: “Elzevir” (Elsevier) — fan, talim va tibbiyot sohasida innovacion echimlarni va mahsulotlarni taklif etadigan jahondagi eng yirik nashriyotlardan biri hisoblanadi.

Kompaniyaning qarorgohlari Amsterdam, London, Nyu-York shaharlarida joylashgan bo'lib, dunyoning ko'plab davlatlarida o'z ofislari bor.

Nashriyot «Reed Elsevier» media-xoldingning bir qismi bo'lib, u jahonning eng yirik kompaniyalari ro'yxatiga kiradi. Ko'plab jurnal, kitob va malumotnomalarni chop etadi. Nashriyotda “Scopus” ilmiy nashrlar va citata keltirish malumotlar bazasini olib boradi, “Science Direct” ilmiy nashrlarni tarqatish tizimini rivojlantiradi.

Universitet matbuot xizmati