O'zining debyut Olimpiadasida ishtirok etadigan, medal kutishga arziydigan Jasurbek Jaysunovga Parijda qaysi taekvondochilar raqiblik qiladi? (Barcha tafsilotlar)

Unda O'zbekiston sharafini tarixda ilk bor 5 nafar taekvondochi himoya qiladi. SHu kungacha 4 nafardan ziyod sportchimiz musobaqada ishtirok etmagan edi.

Olamsport.com musobaqada ishtirok etadigan sportchilarimizga Olimpiada davomida kimlar raqiblik qilishi mumkinligi haqida malumot beradi.

Avvalgi sonimizda Olimpiadaning amaldagi g'olibi Ulug'bek Rashitov haqida malumot bergan edik. Navbat Jasurbek Jaysunovga. 

Yarim o'rta vazn toifasida jang qiluvchi 22 yoshli taekvondochimiz faoliyatidagi debyut Olimpiada uchun yo'llanmani Osiyo licenzion turnirida qo'lga kiritgan edi.

Jaysunovning Parij Olimpiadasidagi ishtiroki 9 avgust kuni bo'lib o'tadi.

Mazkur vazn toifasida Tokio Olimpiadasi g'olibiga aylangan neytral sportchi Maksim Xramkov turnirda ishtirok etmaydi. Kumush medal egasi, iordaniyalik Saleh Elsharabati va bronza sohibi, Misr vakili Seyf Eyssa esa Parijdagi Olimpiadada favoritlardan hisoblanadi. Ikkinchi bronza medali egasi, xorvatiyalik Toni Kanaet ham bu galgi musobaqani o'tkazib yuboradi.

Jasurbek Jaysunov 22 yoshda bo'lishiga qaramasdan, "Katta dubulg'a" turniri vice-chempioni, gran-pri musobaqasi sovrindori, xarbiylar o'rtasida Jahon chempioni, Osiyo chempionatining uch karra g'olibi va bronza medali sohibi hisoblanadi. U o'zi ishtirok etgan so'nggi musobaqalarning qariyb barchasida g'olib yoki sovrindor bo'lmoqda. Tokioda uning vazn toifasida O'zbekiston sharafini tajribali Nikita Rafalovich himoya qilib, o'tish bosqichiga qadar etib borgan edi.

Jasurbek Jaysunovga Parij Olimpiadasida raqiblik qilishi mumkin bo'lgan taekvondochilar:

Leon Seyranovich (Avstraliya)

Enrike Fernandes Rodriges (Braziliya)

Faysal Savadogo (Burkina Faso)

Xoakin Martines CHarchill (CHili)

Edi Xrnich (Daniya)

Seif Eissa (Misr)

Mehran Barxordari (Eron)

Alessio Simeone (Italiya)

Saleh Elsharabati (Iordaniya)

Batirxan Toleugali (Qozog'iston)

Ismael Kulibali (Mali)

Farzad Mansuri (Qochoqlar)

Seo Genvu (Koreya Respublikasi)

Stefan Takov (Serbiya)

Firas Katusi (Tunis)

Sijey Nikolas (AQSH).

22 yoshli taekvondochimiz Jasurbek Jaysunov ko'p ham etibor qaratilmayotgan, aslida esa natija qilib bera oladigan darajada salohiyatli sportchimizdir. Demak, Parij Olimpiadasida taekvondochilarimiz orasida nafaqat Ulug'bek Rashitov, balki Jasurbek Jaysunovdan ham yuqori natija kutib qolamiz!