Олимпиаданинг амалдаги ғолиби Улуғбек Рашитовга бу сафар кимлар рақиблик қилади? (Барча тафсилотлар)

Унда Ўзбекистон шарафини тарихда илк бор 5 нафар таэквондочи ҳимоя қилади. Шу кунгача 4 нафардан зиёд спортчимиз мусобақада иштирок этмаган эди.

Olamsport.com мусобақада иштирок этадиган спортчиларимизга Олимпиада давомида кимлар рақиблик қилиши мумкинлиги ҳақида маълумот беради.

Дастлаб, ярим енгил вазн тоифасидаги спортчимиз, Токио-2020 Олимпиадаси ғолиби Улуғбек Рашитовга тўхталсак.

Рашитов Олимпиада лицензиясини рейтинг даври орқали қўлга киритган. У учун Париждаги Олимпиада фаолиятидаги иккинчиси бўлади. Яъни, Улуғбек мусобақадаги иштироки орқали икки карра Олимпиада ғолибига айланиб олиши эҳтимоли мавжуд.

Улуғбек Рашитовнинг Олимпиада доирасидаги чиқиши 8 август кунига тўғри келади.

Токио-2020 Олимпиадасида ҳамюртимизга финалда мағлуб бўлган британиялик Брэдли Синден ва бронза медали соҳиби, туркиялик Хакан Речбер бу сафарги мусобақада ҳам иштирок этади. Токиодаги иккинчи бронзага эга чиққан хитойлик Жао Шуай ўрнига эса бу сафар Лианг Юшуай турнирга ташриф буюради.

Улуғбек Рашитовга Париж Олимпиадасида рақиблик қилиши мумкин бўлган таэквондочилар:

Эдивал Понтес (Бразилия)

Ибраҳим Майга (Буркина-Фасо)

Марко Голубич (Хорватия)

Бернардо Пие (Доминикан Республикаси)

Аҳмед Нассар (Миср)

Сулейман Алафилиппе (Франция)

Брэдли Синден (Буюк Британия)

Фунг Вай Ло (Гонгконг)

Марк Левенте Жозса (Венгрия)

Заид Карим (Иордания)

Кевин Сого Кассман (Папуа Янги Гвинея)

Лианг Юшуай (Хитой)

Яҳя Ал Готаний (Қочоқлар мамлакати)

Хавер Поло Перес (Испания)

Банлунг Тубтимданг (Таиланд)

Хакан Речбер (Туркия).

22 ёшли Улуғбекнинг натижаларига тўхталадиган бўлсак, у Ўзбекистон тарихидаги энг ёш Олимпиада ғолиби ҳисобланади. Жаҳон чемпионати совриндори, "Катта дубулға" ғолиби, икки карра Гран-при турнирларида тенгсиз бўлган. Осиё чемпиони ва Осиё ўйинлари ғолиби ҳисобланади.

Улуғбек Рашитовга икки карра Олимпиада ғолиби бўлиши йўлида омад тилаймиз!