Parij-2024 arenalari: Mavjli to'lqinlari bilan mashhur Teaxupoo

Hozir biz Parij shahridan 16 300 km uzoqlikda joylashgan Franciya Polineziyasining Taiti oroliga yo'l olamiz. Bu erda Parij-2024 yozgi Olimpiya o'yinlarining syorfing bahslari o'tkaziladi.

Manzilni yanada aniqroq aytadigan bo'lsak, oroldagi Teaxupoo maskani dunyoning eng kuchli syorfing ustalarini o'z bag'rida jamlaydi. Ushbu hudud syorfing bellashuvlari uchun eng yaxshi joy deb topilgan. Boisi unda doimiy mavjlanib turadigan to'lqinlar manzaraga yanayam ko'rk bag'ishlab turadi. SHu bois ham jahondagi eng katta syorfing musobaqalaridan biri ushbu orolda o'tadi. Doimiy to'lqinlarning balandligi 2-3 metrni tashkil etadi. Bazan esa 7 metrgacha ko'tariladi. Bu haqiqiy adrenalin ishqibozlari uchun ayni muddao. Faqat yurtimizdagi muxlislar uchun ushbu sport turidagi bahslarni tomosha qilish ozroq noqulaylik tug'dirishi mumkin. Boisi hududning vaqt mintaqasi Toshkentdan naqd 15 soat orqada.

Teaxupoo Taiti orolining janubi-g'arbiy qismida Parijdan 16 300, Franciya Polineziyasi poytaxti Papeetedan 75 km uzoqlikda joylashgan. Bu erda 27-31 iyul kunlari syorfing dasturidagi 2 ta medallar jamlanmasi o'ynaladi.