Poytaxtimizda festival doirasida sport musobaqalari qizg'in davom etmoqda

O'zbekiston Respublikasi Jismoniy tarbiya va sport vazirligi hamda Milliy olimpiya qo'mitasi tomonidan 10 yanvar sanasidan boshlab mamlakatimizning barcha hududlari bo'ylab «Sportni sev, sport bilan yasha» shiori ostida ommaviy sport musobaqalari bo'lib o'tmoqda.

Festival doirasidagi musobaqalar poytaxtimizda ham yuqori saviyada o'tkazilmoqda desak mubolag'a bo'lmaydi. Jumladan, Sergeli tumani jismoniy tarbiya va sport bo'limi, 1 va 2-sonli bolalar-o'smirlar sport maktabi tashabbusi bilan mahallalarda istiqomat qilayotgan turli yoshdagi aholi ishtirokida shaxmat bo'yicha tuman final bosqichi musobaqasi o'tkazildi.

Bundan tashqari, Yunusobod tumanidagi 1-sonli BO'SMda sambo bo'yicha ochiq birinchilik bo'lib o'tdi. Qizg'in va murosasiz kechgan bahslar yakuniga ko'ra, g'olib va sovrindorlar tashkilotchilar tomonidan diplom, medal va esdalik sovg'alar bilan taqdirlanishdi.

Bu kabi musobaqalar respublikamizning barcha hududlarida o'tkazilmoqda.