Rafael Nadalni Rim "Masters"da "sochib" tashlashdi

Grunt qiroli Rafael Nadal turnirning ikkinchi davrasida dunyoning to'qqizinchi raketkasi bo'lib turgan polshalik Xubert Gurkachga qarshi kortga chiqdi. Ispaniyalik tennis afsonasi ayni paytda ATP reytingida 305-pog'onadan joy olgan. To'qson ikki daqiqa davom etgan bahsda Gurkach afsonaga imkoniyat qoldirmadi - 6/1, 6/3.

Bu tennischilarning o'zaro o'tkazgan ilk uchrashuvi sifatida tarixga kirdi. Nadal 1, Gurkach 9 ta eys zarbani amalga oshirgan. Ikkala tennischi ham 1 tadan qo'shxatoga yo'l qo'ygan. Breyklar 4 ga 0 ko'rinishida g'olib tennischi foydasiga hal bo'ldi. Nadal Rim "Masters" turnirining yagona 10 karra chempioni hisoblanadi. 

Endi Xubert Gurkach uchinchi bosqichda Tomas Martin Etcheverriga qarshi kortga chiqadi. Argentinalik raketkasi ustasi ikkinchi davrada braziliyalik Tyago Zaybot Vildadan 6/3, 7/5 hisobida ustun keldi.