Rim WTA 1000 turniri bosh sovrini kimga nasib etdi?

Hal qiluvchi final uchrashuvida sayyoramizning birinchi va ikkinchi raketkalari - polshalik Iga Svyontek hamda belaruslik Arina Sobolenko o'zaro to'qnash kelishdi. Bir soatu 29 daqiqa davom etgan bahsda Svyontek raqibasini biroz kutilmaganda ortiqcha qiyinchiliksiz mag'lubiyatga uchratdi - 6/2, 6/3. 

Tennischilarning o'zaro uchrashuvlarida Svyontek katta farq bilan oldinda bormoqda - 8:3. Iga finalda 1, Arina 2 ta eys zarbasini amalga oshirgan. Qo'shxatolar ham xuddi shu ko'rinishda Sobolenko "foydasi"ga bo'ldi - 2 ga 1. Breyklar bo'yicha mutlaq ustunlik chempion tomonda - 4 ga 0!

SHu tariqa, Iga Svyontek faoliyatidagi 21-sovrinni qo'lga kiritdi. Uning WTA 1000 toifasiga kiruvchi chempionlik titullari soni 10 taga etdi. SHulardan 4 tasini u shu yilning o'zida qo'lga kiritgan. Polshalik tennis malikasi Rim WTA 1000 turnirida uchinchi bor chempion bo'ldi. U 2021 va 2022 yillarda ham bosh sovrin sohibasiga aylangan edi. 

Internazionali BNL d'Italia turniridagi muvaffaqiyatli ishtirok Svyontekka 1000 reyting ochkosi hamda 699,690 evro mukofot puli taqdim etdi.