Ro'yi zamin sayqali Markaziy Osiyoda ilk bor Xalqaro avtomobil federaciyasining Konferenciyasiga mezbonlik qiladi

Malumot uchun, FIA – Xalqaro avtomobil federaciyasi 1904 yil tashkil topgan bo'lib, kartingdan tortib, Formula-1 bolidlarigacha bo'lgan avtopoygalarni o'tkazishga masul tashkilot hisoblanadi.

Markaziy Osiyo mintaqasida ilk bor o'tkazilayotgan Konferenciya doirasida FIA tashkil etilganining 120 yilligi ham keng nishonlanadi. Qolaversa, ushbu nufuzli tadbirda ishtirok etish uchun 147 mamlakatdan 500 nafardan ortiq martabali mehmonlar, milliy federaciyalar rahbariyati va dunyoning taniqli poygachilari mamlakatimizga tashrif buyuradi. 

Xususan, tadbirning eng nufuzli mehmoni hisoblangan FIA prezidenti Muhammad Ahmad ben Sulaem ham Samarqandga etib keldi. Martabali mehmonni viloyat hokimi Erkin Turdimov, Osiyo Olimpiya kengashi vice-prezidenti Otabek Umarov, MOQ hamda O'zbekiston avtosport va karting milliy federaciyasi rahbariyati qarshi olishdi.

Bo'lajak tadbir doirasida FIA rahbari tashabbusi bilan tashkilot jamg'armasi, shuningdek, dunyodagi taniqli kollekcionerlar ko'magida eng ajoyib superkarlar to'plamini o'z ichiga olgan noyob avtoko'rgazma tashkil etiladi. Dasturga muvofiq, 13 iyun kuniga qadar sohada erishilgan yutuqlar bilan tajriba almashish maqsadida turli seminarlar, ko'rgazma va davra suhbatlari, musobaqalar o'tkaziladi. 

Konferenciyaning so'nggi kunida FIA`ning navbatdan tashqari Bosh Assambleyasi o'tkazilishi rejalashtirilgan. Tadbirning asosiy tashkilotchisi O'zbekiston avtosport va karting milliy federaciyasi hisoblanadi.

Bir so'z bilan aytganda, Konferenciya mamlakatimizda avtosportni yanada rivojlantirish, uning istiqbolini yangi bosqichga olib chiqish uchun muhim platforma bo'lishi kutilmoqda.