Sambo bo'yicha O'zbekiston chempionatining tantanali ochilish marosimi bo'lib o'tdi + FOTO

Bugun "Universal" sport saroyida musobaqaning tantanali ochilish marosimi ham tashkil etildi. 

Tadbirda O'zbekiston Milliy olimpiya qo'mitasi raisi Rustam SHoabdurahmonov, bosh kotib Oybek Kasimov, MOQ raisi o'rinbosari SHerzod Tashmatov, Jismoniy tarbiya va sport vazirining birinchi o'rinbosari Ravshan Ermatov, Osiyo sambo uyushmasi raisi Alamjon Mullaev va va boshqalar ishtirok etishdi. 

Tadbirda so'zga chiqar ekan, O'zbekiston Jismoniy tarbiya va sport vazirining birinchi o'rinbosari Ravshan Ermatov yurtimizda sportga qaratilayotgan etibor, samboning rivojlanib borayotgani, ushbu musobaqa yangidan-yangi nomlarni kashf etishi haqida gapirdi. 

MOQ raisi Rustam SHoabdurahmonov esa barcha ishtirokchilarga omad tiladi. 

"Bugun katta sport bayrami. Sizlarni ko'rib havasimiz kelmoqda. Sport ananalari davom etayotgani bizni xursand qilmoqda. Sambo jasur yigit-qizlarimizning sporti hisoblanadi. Ushbu sport turi katta maktab, katta tarixga ega hisoblanadi. Musobaqada ishtirok etuvchi barchaga omad tilayman", - dedi Rustam SHoabdurahmonov. 

Ishtirokchilarning tantanali paradidan keyin estrada xonandalarining chiqishi, yig'ilganlarga ko'tarinki kayfiyat bag'ishladi. 

Tadbirning badiiy qismidan so'ng O'zbekiston chempionatining birinchi kungi final bellashuvlari boshlandi. 

O'zbekiston sambo associaciyasi matbuot xizmati