SHaxmatchilarimiz Braziliyada chempionlik uchun kurashmoqda

16 yoshgacha bo'lgan qizlar o'rtasida Vatanimiz sharafini himoya qilayotgan Afro'za Hamdamova oq donalarda meksikalik Gvadelupe Mantano Visente bilan o'yin o'tkazdi. Qiziqarli kechgan uchrashuvning 67-yurish holatida tomonlar murosa yo'lini tanlashga majbur bo'ldi. Ushbu natijadan keyin Hamdamova 2,5 ochko bilan kuchli beshlikdan joy olishga erishdi.

Ushbu turda terma jamoamiz azolaridan Javohir Bozorov 14 yoshgacha bo'lgan o'g'il bolalar musobaqasida oq donalarda Janubiy Afrika vakili Kaleb Deysel bilan bahs olib bordi va ishonchli tarzda g'alabaga erishdi.

14 yoshgacha bo'lgan qizlar o'rtasidagi bahsda kanadalik Anais Xloya Fisel bilan bellashgan Nilufar Imomqo'zieva qora donalarda harakatlanishiga qaramasdan muvaffaqiyatga erishdi.

Jahon chempionatining 4-turida Afro'za Hamdamova qora donalarda paragvaylik Mayergger Gonsales bilan, Javohir Bozorov germaniyalik Daniel Nunes Gregur bilan, Nilufar Imomqo'zieva armanistonlik Sona Krkyasharyan bilan kuch sinashadi.

CHempionatning 4-tur o'yinlari oldidan Javohir Bozorov o'z yosh toifasida 2 ochkoga ega bo'lib turibdi. Ushbu yosh toifasida  118 nafar yosh shaxmatchi qatnashayotgan bo'lsa, ularning 6 nafari 3, 11 nafari 2,5 va 42 nafari 2 ochko jamg'arishga muvaffaq bo'lgan.  

14 yoshgacha bo'lgan qizlar orasida esa terma jamoamiz azosi Nilufar Imomqo'zievaning kuchlilar qatoridan o'rin olish uchun ko'rsatkichlari bir muncha etiborli. U hozirda 2,5 ochkoga ega. Ushbu guruhda 7 nafari 3, 8 nafari 2,5 ochko bilan g'oliblik yo'lidagi kurashni davom ettirmoqda.

Eslatib o'tamiz, 11 turdan iborat jahon chempionati bahslari 10 noyabrga qadar davom etadi