SHirin shahrida bel olish va uch kurash bo'yicha O'zbekiston chempionati boshlandi

O'zbekiston Respublikasi Jismoniy tarbiya va sport vazirligi hamda O'zbekiston Bel olish va uch kurash associaciyasining yillik – taqvim rejasidagi mazkur mamlakat chempionatida  Qoraqalpog'iston Respublikasi, Toshkent shahri va barcha  viloyatlardan  500 nafardan ortiq yosh polvonlar g'oliblik uchun kurash tushishmoqda.

BO'SM  sport zalida dastlab,  musobaqaning tantanali ochilish marosimi  tashkil etildi. Marosimda so'z olgan  SHirin shahar hokimining yoshlar siyosati, ijtimoiy rivojlantirish va manaviy – marifiy ishlar bo'yicha o'rinbosari Nasiba Alimova, O'zbekiston bel olish va uch kurash associaciyasi bosh kotibi Nosir Azizovlar sportchilarni qutlar ekan,  mamlakatimizda jismoniy tarbiya va sportning ommaviyligiga keng etibor qaratilayotgani, xususan, milliy sport turlariga bo'lgan qiziqish va etiborning ortgani haqida takidlab,  musobaqa qatnashchilariga  muvaffaqiyat tilashdi. SHundan so'ng bellashuvlarga start berildi.  

Musobaqa reglamentiga muvofiq, bugun 2005 - 2008  yillarda tug'ilgan o'smirlar bel olish kurash turi bo'yicha bel olish, bel olishning xalqa  - chalish, bel olishning xalqa - chalishsiz yo'nalishlarida o'g'il bolalar 10 ta vaznda, qizlar esa 3 ta vazn toifasiga  ko'ra bellashishadi. Musobaqalar 25 dekabrga qadar davom etadi.