01 fev 08:18
Yangiliklar

Boshqalar

Talabalar kibersport musobaqasida + FOTO

Teglar : Kibersport

O'zbekiston kibersport associaciyasining tashabbusi bilan Toshkent shahrida joylashgan OTM talabalari o'rtasida kibersportning uch yo'nalishi – “CS: GO”, “DOTA 2” hamda “PUBG Mobile” yo'nalishlari bo'yicha mukofot jamg'armasi 100 000 000 so'm bo'lgan “Univerity cyber cup” turnirining final bosqichi bo'lib o'tdi.

Musobaqa “Uzcard” kompaniyasining bosh homiyligida, shuningdek, Jismoniy tarbiya va sport vazirligi, O'zbekiston Milliy olimpiya qo'mitasi, O'zbekiston yoshlar ittifoqi, O'zbekiston yoshlar ishlari agentligi, O'zbekiston innovacion rivojlanish vazirligi qoshidagi “Yoshlar akademiyasi” ko'magida, qolaversa, ITV, Dr.Web, SteelSeries tashkilotlari hamkorligida tashkillashtirildi. Tadbirning ochilish MOQ raisi Rustam SHoabdurahmonov, Jismoniy tarbiya va sport vazirining birinchi o'rinbosari Ravshan Irmatov, MOQ Bosh kotibi Oybek Kasimov va rais o'rinbosarlari Saken Polatov hamda Azizjon Kamilov ham ishtirok etishdi.

Mazkur turnirning saralash musobaqalari poytaxtning 28 ta OTMlari talabalari o'rtasida onlayn tarzda bo'lib o'tdi. Saralash o'yinlarida jami 400 nafarga yaqin talaba ishtirok etdi.

SHiddatli hamda murosasiz kurashlarga to'la o'tgan turnirda: “DOTA 2” yo'nalishida Toshkent shahridagi INXA universiteti talabalari g'oliblikni qo'lga kiritishgan bo'lsa, “CS: GO” yo'nalishida Toshkentdagi Singapur menejmentni rivojlantirish instituti talabalariga teng keladigani topilmadi. “PUBG Mobile” bo'yicha Toshkent davlat iqtisodiyot universiteti jamoasi barcha raqiblarini dog'da qoldirdi.

Musobaqaning final bosqichida ishtirokchilarga ilhom bag'ishlash maqsadida qiziqarli ko'ngilochar dasturlar, homiylar tomonidan taqdim etilgan sovg'alar, shuningdek, ko'rgazmali chiqishlar uyushtirildi.