Tennischi Temur Ismoilovning 7 yilga diskvalifikaciya qilingani yuzasidan rasmiy bayonot

Mazkur holat yuzasidan O'zbekiston Respublikasi Jismoniy tarbiya va sport vazirligi hamda Milliy Olimpiya qo'mitasi quyidagilarni malum qiladi:

Temur CHingizovich Ismoilov 1995 yil 14 yanvarda tug'ilgan. 2013 yildan to 2017 yilgacha O'zbekiston terma jamoasi sharafini himoya qilgan. O'sha yili oilasi bilan birga doimiy yashash uchun AQSHga ko'chib ketganligi sababli terma jamoa safidan chiqarilgan.

T.Ismoilov haligacha AQSH fuqaroligini olmagani bois bugungacha Xalqaro tennis federaciyasi (ITF) hamda professional tennischilar associaciyasi (ATR) tasnifiga kiruvchi musobaqalarda O'zbekiston bayrog'i ostida qatnashib kelgan.

Bugun, 2020 yil 23 dekabr kuni tennis o'yinlarini tekshirishga masul bo'lgan Tennis Integrity Unit tashkiloti T.Ismoilovning ITF hamda ATR tasnifidagi turnirlarda kelishilgan o'yinlarda ishtirok etgani uchun 7 yilga sportdan chetlatilgani haqidagi qarorini matbuotda elon qildi.

Ayni paytda Temur Ismoilov tennis bo'yicha O'zbekiston terma jamoasi azosi sifatida ro'yxatda turmasligini malum qilamiz.

Jismoniy tarbiya va sport vazirligi Matbuot xizmati