Toshkent “CHellenjer”. Bugun Istomin eski tanishiga qarshi kortga chiqadi

Sovrin jamg'armasi 75 000 AQSH dollarini tashkil qiluvchi ushbu turnirda bugun ikkinchi davra uchrashuvlari boshlanadi. Bugun mamlakatimizning birinchi raketkasi Denis Istomin chorak final chiptasi uchun kortga chiqadi. 

Uning raqibi qozog'istonlik Aleksandr Bublik bo'ladi. Eski tanishlar uchrashuvi soat 12:00dan erta bo'lmagan vaqtda boshlanadi. Ayni paytda Denis ATP reytingida 87, Bublik esa 217-o'rinni egallab turibdi. Lekin qozog'istonlik tennischi Istomin uchun biroz noqulay raqib hisoblanadi. 

So'nggi bor bu ikki tennischi Indoneziyadagi Osiyo o'yinlarining chorak finalida o'zaro to'qnash kelishgan va o'shanda Bublik issiq havo, aniqrog'i oftob urishi natijasida bahsni yakuniga etkaza olmagandi. Uchrashuv ikkinchi setning uchinchi geymidan so'ng to'xtatilgandi. 

Birinchi setda 6:1 hisobida zafar quchgan Denis ikkinchi setni ham 3:0 hisobida o'z foydasiga hal qilayotgan edi. Undan avvalgi ikki uchrashuvda Bublik g'alaba qozongan. Yana ham aniqrog'i, bitta bahsda hamyurtimiz kortga chiqa olmagan.