Toshkentda “Mo'ynoqqa madad” velomarafoni o'tkazildi

 Bugun poytaxtimizdagi markaziy ko'chalarda ushbu shior ostida velomarafon tashkil etildi.

“Humo arena” muz saroyining oldida start olgan musobaqa Toshkentning chiroyli va etiborli ko'chalari bo'ylab yo'nalish oldi. Bu esa shahrimiz aholisi orasida sog'lom turmush tarzini yana-da keng targ'ib qilish, yoshlarni sportga jalb etish yo'lidagi muhim tadbirlardan biri bo'ldi. Ahamiyatlisi, unda yaqinda tuzilgan para-velosport bo'yicha terma jamoamiz vakillari ham ishtirok etishdi.

Ekologik xayriya marafonining ochilish marosimida MOQ raisi Rustam SHoabdurahmonov, Turizm va sport vazirining o'rinbosari Avaz Karimov, O'zbekiston Ekologik partiyasi Markaziy Kengashi ijroiya qo'mitasi raisi Narzullo Oblomurodov, O'zbekiston velosiped sporti federaciyasi mutasaddilari ishtirok etishdi. Tadbirda so'z olgan vakillar hukumatimiz boshchiligida sog'lom turmush tarzi targ'ibotiga qaratilayotgan etibor, ayniqsa, Orolbo'yi hududida ekologik muvozanatni tiklash kabi yo'nalishlarda olib borilayotgan islohotlarga urg'u berib o'tishdi.

Mazkur loyiha 21-may kuni yurtimizning eng chekka sharqiy hududi, Andijon viloyatining Xonobod shahrida start olgan bo'lib, Mo'ynoq shahrida yakunlanadi. Undan tushgan xayriya pullari Mo'ynoqning irrigaciya tizimlarini yaxshilash, aholini toza ichimlik suvi bilan taminlash kabi muammolarini hal etishga yo'naltiriladi.