Toshkentda shinkiokushinkay karate bo'yicha "Mustaqillik Kubogi" o'tkazildi

O'zbekiston Respublikasi mustaqilligining 32 yilligiga bag'ishlab tashkil etilgan musobaqada Qoraqalpog'iston Respublikasi, viloyatlar, Toshkent shahri hamda qo'shni Qozog'istondan kelgan 100 nafardan ziyod karatechilar tatamiga chiqishdi. 

Murosasiz bellashuvlar yakunida umumjamoa hisobida Samarqanl viloyati karatechilari birinchi o'rinni band etishdi. Toshkent shahri jamoasi ikkinchi o'rinni egallagan bo'lsa, kuchli uchlikka Namangan viloyati vakillari yakun yasab berishdi. 

Ushbu musobaqani o'tkazishdan ko'zlangan maqsad terma jamoa tarkibini shakllantirib olishdan iborat. G'olib karatechilar terma jamoa tarkibida kelasi yili Tailand davlati mezbonlik qiladigan Osiyo chempionatiga tayyorgarlik ko'radi. 

Malumot uchun, ayni paytda Hasan Nazarov boshchiligidagi terma jamoamiz karatechilari 14-15 oktyabr kunlari Yaponiya poytaxti Tokio shahrida o'tkaziladigan kattalar o'rtasidagi 13-jajon chempionatiga hozirlik ko'ryapti. Dunyo birinchiligida 103 davlat  sportchilarining ishtirok etishi kutilmoqda. Har to'rt yilda bir marotaba o'tkazib kelinayotgan jahon chempionatida SHahboz Mirzaev va Ulug'bek Hamdamov yurtimiz sport sharafini himoya qiladi. 

SHinkiokushinkay karatega oid yana bir yangilik, 6 nafar hamyurtlarimiz 17-19 oktyabr kunlari o'tkaziladigan nufuzli xalqaro seminarda ishtirok etish uchun tayyorgarlik ko'rishyapti. Imtihondan muvaffaqiyatli o'tganlar jahon karate tashkiloti tomonidan maxsus sertifikatlar bilan taqdirlanishadi.