Voleybol: Serbiyalik mutaxassis O'zbekiston U19 terma jamoasi bosh murabbiyi etib tayinlandi

Malumki, joriy yilning 24 iyul - 3 avgust kunlari poytaxtimiz Toshkentda voleybol bo'yicha erkaklar terma jamoalari ishtirokida jahon chempionati musobaqalari o'tkaziladi.

- Dunyoning eng kuchli 24 ta milliy terma jamoalari ishtirok etadigan dunyo birinchiligida mezbon mamlakat sifatida munosib ishtirok etish asosiy vazifamiz. SHu jihatlarni inobatga olib, Xalqaro voleybol federaciyasi rahbariyati bilan olib borilgan muzokaralar natijasida FIVB instruktori, Belarus, Greciya, Quvayt, Liviya, Janubiy Koreya, Filippin, Ruminiya, Saudiya Arabistoni va Tunis davlatlaridagi etakchi voleybol klublarida va milliy jamoalarda bosh murabbiy sifatida ishlagan Moro Branislav yurtimizga taklif etildi. Xalqaro maydonda katta tajribaga ega mutaxassisning terma jamoada ish boshlashi sportchilarimiz qatori, murabbiylarimizning ish samaradorligiga ijobiy tasir ko'rsatishi shubhasiz, - deydi mamlakat voleybol federaciyasi raisi o'rinbosari Jamshid Fayziev,

O'zbekiston voleybol federaciyasi tomonidan milliy terma jamoalarimizga jalb etilgan Moro Branislav shu kunlarda Toshkentda O'zbekiston U-19 va mamlakat kattalar terma jamoasida o'tkazilayotgan o'quv-mashg'ulotida qatnashmoqda.

Har kunlik mashg'ulotlar jarayonida Moro Branislav sportchi va murabbiylarga chigalyozdi mashqlarini qay tartibda olib borish, hujum va himoya zonalarida harakatlanish tamoyillari kabi qator masalalarda zarur ko'rsatmalarni berib bormoqda.

To'lqin RO'ZIEV tayyorladi