Viral surat ortidagi Merem: Turkiya voleybolining 20 yoshli go'zali butun dunyoni o'ziga qaratmoqda

3 oktyabr kuni "Bodrum Belediyesi Bodrumspor"ning "Karşıyaka"ga qarshi o'yini oldidan joylangan oddiy surat esa vaziyatni o'zgartirib yubordi.

20 yoshli voleybolchining jamoa libosidagi surati avval Turkiyadagi, keyin esa xorijdagi ijtimoiy tarmoq sahifalarida keng tarqaldi. Jabbarog'lu keyinchalik bu qadar katta qiziqishni umuman kutmaganini aytdi. Eng qizig'i, suratni joylagan paytda u do'sti bilan tovuqli palov eb o'tirganini eslagan.

Ammo Merem haqidagi voqea faqat viral surat* bilan tugamaydi. Ijtimoiy tarmoqlar uni bir necha kunda tanitgan bo'lsa-da, voleyboldagi yo'li ancha oldin boshlangan.

Merem Jabbarog'lu kim?

Merem Jabbarog'lu 2006 yil 14 fevralda tug'ilgan. U 20 yoshda, bo'yi 163 santimetr va voleybolda libero poziciyasida o'ynaydi. 2026/27 yilgi mavsumda u Turkiya Ayollar voleybol 1-ligasining A guruhida qatnashayotgan "Bodrum Belediyesi Bodrumspor" sharafini himoya qilmoqda.

Libero odatda jamoaning ko'p ham ko'zga tashlanmaydigan hujumchisi. U ochkolarni kuchli zarbalar yoki bloklar bilan yig'maydi. Uning asosiy vazifasi — raqib servislarini qabul qilish, himoyada murakkab to'plarni saqlab qolish va jamoaning keyingi hujumini boshlash uchun imkoniyat yaratish.

SHu manoda libero — maydondagi eng kam "shovqinli", ammo jamoa tizimi uchun eng muhim poziciyalardan biri.

Meremning 163 santimetrlik bo'yi ham aynan shu amplua uchun noodatiy emas. CEVning rasmiy bazasida uning 2021 yildagi U16 terma jamoasi qaydnomasida ham poziciyasi libero sifatida ko'rsatilgan.

Voleybol yo'li Anqara bilan boshlangan

Jabbarog'lu o'zining voleybol faoliyati Anqarada boshlanganini aytadi. Uning ilk muhim bosqichlaridan biri Turkiya Voleybol federaciyasining yoshlar tizimidagi TVF Spor Lisesi bo'lgan.

Ochiq sport bazalaridagi malumotlarga ko'ra, keyinchalik u "MKE Ankaragücü", "Alpet Zeren Spor" va "Zeren Spor" U18 tarkiblarida ham o'ynagan. 2026 yil yozida esa "Bodrum Belediyesi Bodrumspor" yangi mavsum uchun Jabbarog'lu bilan shartnoma tuzganini elon qildi.

Bodrum klubi yangi mavsum oldidan jamoani yosh voleybolchilar asosida qayta shakllantirdi. Merem ham shu loyihaning yangi transferlaridan biri bo'ldi. Bosh murabbiy Adnan Kistak boshchiligidagi tarkib Turkiya Ayollar 1-ligasida qatnashmoqda. 

15 yoshidayoq Turkiya terma jamoasi tizimida

Meremning faoliyatidagi muhim detallardan biri — u ijtimoiy tarmoqlarda tanilishidan ancha avval yoshlar terma jamoasi tizimiga kirib ulgurgan.

Evropa voleybol konfederaciyasi — CEVning rasmiy malumotlarida Jabbarog'lu 2021 yilgi U16 qizlar o'rtasidagi Evropa chempionati uchun Turkiya tarkibida qayd etilgan. O'sha paytda u 15 yoshda edi. CEV uni 163 santimetr bo'yli libero sifatida ko'rsatadi.

Bu malumot uning mashhurligi faqat so'nggi haftalardagi ijtimoiy tarmoq fenomeni emasligini ko'rsatadi: Jabbarog'lu o'smirlik davridayoq Turkiyaning yoshlar terma jamoasi selekciyasiga kirgan.

Bir surat va kutilmagan mashhurlik

2026 yil 3 oktyabrda "Bodrumspor" "Karşıyaka"ga qarshi mavsumdagi dastlabki o'yinlaridan biriga tayyorlanayotgan edi. Merem jamoa formasidagi suratini ijtimoiy tarmoqdagi sahifasiga joyladi.

Keyin esa voqea uning nazoratidan chiqib ketdi.

Surat turli sahifalarda qayta joylana boshladi. U haqidagi qidiruvlar ko'paydi, Turkiya OAVlari ketma-ket "Merem Jabbarog'lu kim?" degan materiallarni elon qildi.

Meremning o'zi esa bunga ancha ehtiyotkor munosabat bildirdi. U ijobiy va salbiy izohlarni ko'p o'qimaslikka harakat qilayotganini aytdi.

"Bunday narsani kutmagandim, hayron qoldim. Ijtimoiy tarmoqlarda hamma narsa birdan tarqalib ketishi mumkin", — dedi u DHAga bergan intervyusida.

Qiziq tomoni shundaki, jamoatchilik uni birdan tashqi ko'rinishi orqali kashf etgan bir paytda, Jabbarog'luning o'zi suhbatlarda etiborni sportga qaytarishga harakat qilmoqda.

Onasi rossiyalik, otasi Yozgatdan

Viral suratdan keyin Meremning kelib chiqishi haqida ham ko'plab taxminlar tarqaldi. U bu savolga o'zi aniqlik kiritdi.

Jabbarog'luning aytishicha, onasi rossiyalik, otasi esa Turkiyaning Yozgat viloyatidan. O'zi Anqarada tug'ilib o'sgan va o'zini anqaralik deb hisoblaydi.

SHu bois internetdagi uning qaerlik ekani haqidagi turli versiyalar o'rniga sportchining o'z bayonotiga tayanish to'g'riroq.

Eng katta maqsad — "Filenin Sultanları"

Birdan kelgan mashhurlikka qaramay, Merem hozircha uzoq muddatli katta vadalar berishni istamaydi.

U avvalo "Bodrumspor" bilan jarohatlarsiz va yaxshi mavsum o'tkazishni, keyin esa faoliyatida bosqichma-bosqich oldinga yurishni maqsad qilgan.

Ammo uning katta orzularidan biri aniq — Turkiyaning A milliy ayollar voleybol terma jamoasi formasini kiyish.

Jabbarog'lu Turkiya ayollar terma jamoasi o'yinchilarini o'zi uchun namuna deb atagan. Uning fikricha, turli sport turlarida xalqaro muvaffaqiyatlarga erishayotgan turkiyalik ayollar yosh qizlarga o'z imkoniyatlarini kengroq ko'rishga yordam beradi.

Bu maqsadga erishish oson emas. Turkiya ayollar voleyboli so'nggi yillarda dunyodagi eng kuchli va raqobat yuqori tizimlardan biriga aylandi. Ayniqsa, milliy terma jamoaga kirish uchun ichki chempionatda barqaror o'yin va yuqori saviyadagi himoya ko'rsatkichlari talab qilinadi.

Jabbarog'lu esa hozircha yo'lning boshida.

Viral mashhurlik sport faoliyatiga aylana oladimi?

Merem Jabbarog'luning hikoyasidagi eng qiziq jihat ham shu.

Ijtimoiy tarmoq bir necha kun ichida unga professional faoliyatining shu paytgacha bermagan darajasida tanilish olib keldi. Ammo voleyboldagi keyingi bosqichni Instagram algoritmlari emas, uning maydondagi o'yini belgilaydi.

U 15 yoshida Turkiyaning U16 tizimiga kirgan, turli klublarda tajriba yig'gan va hozir 20 yoshida Birinchi ligada o'ynamoqda. "Bodrumspor" esa uning katta voleybol sari navbatdagi bekatlaridan biri. 

SHuning uchun Merem Jabbarog'lu haqidagi eng qiziq savol "nega birdan mashhur bo'ldi?" emas. Asosiy savol — bu mashhurlikdan keyin u qanday voleybolchiga aylanadi?

Agar u o'zi aytganidek, qadam-baqadam rivojlanib borsa, bir necha yil o'tib Merem haqida viral surati sabab emas, balki terma jamoadagi o'yini sabab yozish imkoniyati ham paydo bo'lishi mumkin.

*«Viral surat» degani — internetda tez tarqalib, ko'pchilik ko'radigan, layk bosadigan va boshqalarga ulashadigan surat degani.

Instagram’da suratingiz juda ko'p odamlarga yoqib, minglab odamlar uni ko'rsa — viral surat bo'lishi mumkin.

Suratingizni ko'pchilik storisga qo'ysa yoki boshqalarga yuborsa — u viral bo'lishi mumkin.

Qisqacha: «Viral» — internetda tez ommalashgan degani.